Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Սիրելի բարեպաշտ հաւատացեալ ժողովուրդ.

Վերստին մեծ ուրախութեամբ տօնում ենք մեր Տէր եւ Փրկիչ Յիսուս Քրիստոսի Սուրբ Յարութեան տօնը: Փառաբանութիւն եւ օրհներգութիւն է այսօր մեր հոգիներից բարձրանում երկինք, գոհաբանական աղօթք` առ Տէրը, Ով յաղթական Իր Յարութեամբ շնորհեց մեզ փրկութիւն եւ կեանք: Այսօր խնդութեամբ ողջունում ենք միմեանց քրիստոնեաներիս համար անհունօրէն բաղձալի «Քրիստոս յարեաւ ի մեռելոց» աւետիսով:

Քրիստոսի հրաշափառ Յարութիւնը կատարուած ու վկայուած իրադարձութիւն է: Իւղաբեր կանայք եղան առաջինները, ովքեր կիրակի առաւօտեան թափուր գտան իրենց խաչեալ Վարդապետի գերեզմանը եւ մինչ զարմացած էին` լսեցին հրեշտակի աւետիսը. «Չէ աստ, այլ` յարեաւ» (Ղուկ. ԻԴ 6): Քրիստոսի Յարութեան վկայութիւնն է եւ մեր հաւատը, ի սփիւռս աշխարհի հաւատացեալներով լեցուն Քրիստոսի Յարութիւնն օրհնաբանող եկեղեցիները, Յարուցեալ Փրկչի Էջքի վկայ այս Սուրբ Տաճարը: Քրիստոսի Յարութեան վկայութիւնը նաեւ այդ հաւատով ու փրկութեան յոյսով գողգոթաներից դէպի կեանք ընթանալու մեր ժողովրդի հրաշագործ ուժն է:

Սիրելի եղբայրներ եւ քոյրեր: Դարերի հոլովոյթում երկրի վրայ մարդկային շատ արիւն է թափուել: Սակայն աշխարհում հեղուած արեան ոչ մի կաթիլ այնքան չի ազդել մարդկութեան պատմութեան, մարդկային մտքի ու հոգեւոր ներաշխարհի վրայ, որքան Քրիստոսի հեղած Սուրբ եւ Կենարար Արիւնը: Աստուածորդին աշխարհի փրկութեան համար Իր կեանքը տուեց որպէս փրկագին, եւ Քրիստոսի զոհաբերութիւնը դարձաւ մարդկութեան հանդէպ աստուածային սիրոյ մեծագոյն ապացոյցը: Իր զոհաբերութեամբ ու Յարութեամբ Քրիստոս մարդկութեանը պարգեւեց ազատութիւն չարի իշխանութիւնից, մեղքի ու մահուան գերութիւնից: Քրիստոս ընծայեց մեզ ազատութիւն, որ վեր է այդ հասկացութեան մարդկային սովորական ըմբռնումներից, ազատութիւն, որ շնորհ է` ընթանալու դէպի վերածնուած կեանք, արդարութեամբ, խաղաղութեամբ նորոգուած կեանք եւ այնքան բաղձալի ու փնտրուած յաւիտենութիւնը կեանքի:

Քրիստոնէական բոլոր եկեղեցիների զանգերի հետ Զատկական հոգենորոգ այս խորհուրդն է տարածուում այսօր աշխարհում: Հովուապետ, առաջնորդ եւ հովիւ եկեղեցիների սուրբ սեղանների առջեւ պատարագ են մատուցում, աղօթք բարձրացնում երկինք, «Քրիստոս յարեաւ» աւետիսով ողջոյն փոխանցում քրիստոնեայ աշխարհին եւ խաղաղութեան ու սիրոյ պատգամը` համայն մարդկութեանը, որ խնամուի ու անխաթար պահպանուի արարչագործութիւնը Աստուծոյ, գնահատուի եւ կարեւորուի մարդը այնպէս, ինչպէս Աստուած սիրեց մարդուն: Կոչուած ենք Տիրոջից եւ ժամանակի հրամայականների առջեւ պարտաւորուած` միաւորելու մեր ջանքերը յանուն աշխարհում ազատ ու երջանիկ կեանքի, յանուն մարդասիրութեան արժէքների, որոնք օրհնեալ պարգեւն են Աստուծոյ:

Աշխարհն, աւաղ, այսօր էլ տագնապով են լցնում Քրիստոսի Յարութեան լոյսից հեռացող ընթացքները: Մեր օրերում էլ տարածուում են յուդայական համբոյրներն ու նիւթապաշտութիւնը: Պիղատոսեան օրինակով շատերը լուանում են իրենց ձեռքերը` ոտնահարելով արդարութիւնը սեփական բարօրութեան համար: Այսօր էլ խաղաղաբեր Քրիստոսին մերժելու եւ աւազակ Բարաբբային ընտրելու օրինակին են հետեւում մարդիկ` իրենց խաբեութիւններով ու բռնութիւններով, սպանութիւններով եւ սեփական շահերի համար այլոց ոտնակոխ անելու մոլուցքով: Խաչի մօտ սգացող Աստուածածինը այսօր ողբում է որդեկորոյս մայրերի հետ պատերազմներում զոհուած զաւակների համար, սգում է չարագործութիւններով իրենց խաչողների համար եւ աշխարհը վշտերով լցնող բազում անարդարութիւնների, նեղութիւնների, աղքատութեան ու կարօտութեան համար:

Աշխարհի այս իրադրութեան մէջ շարունակուում են փորձութիւնները եւ մեր ժողովրդի: Տակաւին ստիպուած ենք պայքարել Լեռնային Ղարաբաղի հայութեան ազատ ու ապահով ապրելու աստուածաշնորհ իրաւունքի համար, Ցեղասպանութեան համընդհանուր դատապարտութեան համար, հայ հոգեւոր եւ մշակութային արժէքների, մեր սրբութիւնների ու սրբավայրերի պահպանութեան եւ փրկութեան համար հարեւան երկրներում:

Ցեղասպանութեան փաստը մերժող քաղաքականութիւնը պատճառ է ֆիզիկական, մշակութային, հոգեբարոյական նոր ցեղասպանութիւնների: Անպատիժ ոճրագործութիւնները անխուսափելիօրէն ծնում են նորերը: Հայոց Ցեղասպանութեանը հետեւեց Հոլոքոստը, նաեւ` Ռուանդայի, Դարֆուրի եւ այլ ցեղասպանութիւններ: Բուդդայական արձանների կործանմանը Աֆղանստանում հետեւեց Նախիջեւանի հազարաւոր հնագոյն խաչքարերի ոչնչացումը Ադրբեջանի զինուորների կողմից: Օրեր առաջ` երբ տակաւին մեր ժողովրդի հոգում չի սպիացել վէրքը Հրանտ Դինքի սպանութեան, թուրքական իշխանութիւնները, աւարտելով Աղթամարի Սուրբ Խաչ եկեղեցու նորոգումը, հայկական դարաւոր սրբավայրը վերածեցին թանգարանի: Ցեղասպանութեան օրերից եկեղեցին կանգնած էր աղօթական լռութեամբ, այսօր նորոգուած եկեղեցում արգելուած է աղօթքը: Արդարեւ, այսպիսին չեն կարող լինել կրօնների եւ մշակոյթների երկխօսութեան այս նոր դարի ոգին եւ ժողովուրդների համերաշխ գոյակցութեան ձգտումները:

Աստծուն ապաւինած` մեծ է մեր յոյսը արդարութեան, ազատութեան, խաղաղութեան յաղթանակի, եւ կենդանի է մեր հաւատը, որով պիտի կերտենք մեր կեանքի նոր յաղթանակները, պիտի կանգնեցնենք աղօթախօս նոր խաչքարեր, լուսեխորան նոր տաճարներ ու բարձրացնենք յաղթութեան նոր կոթողներ յարութեան շնորհի այն ուժով, որ պարգեւում է մեզ Ամենախնամ Փրկիչ մեր Տէրը:

Սիրելի հաւատացեալ զաւակներ մեր, կրկին կենարար աւետիսն ենք բերում ձեզ. «Քրիստոս յարեաւ ի մեռելոց, մահուամբ զմահ կոխեաց եւ Յարութեամբն Իւրով մեզ զկեանս պարգեւեաց»: Մարդկանցից խաչուածը յարութիւն է առել, աստուածային զօրութեամբ բացուել է վէմը գերեզմանի, եւ մեր սրտերում տէրունաշնորհ փրկութեան ցնծութիւնն է: Փրկչի Յարութեան բիւր շնորհներով թող որ զօրանան մեր հոգիները` հաւատքի վէմի վրայ հաստատուած գործերով բարօր եւ լուսաշող դարձնելու մեր Հայրենիքի, մեր ժողովրդի ու Եկեղեցու վերազարթօնքի ուղին: Նորոգուած այս հաւատով անցկացնենք խորհրդարանական առաջիկայ ընտրութիւնները, նախանձախնդրութեամբ, ապագայի հանդէպ վստահութեամբ ու պատասխանատուութեամբ: Թող Յարուցեալ Քրիստոսի բիւր ողորմութեանց ներքոյ լինի մեր Հայրենիքը, աշխարհը համայն, եւ ազգեր ու ժողովուրդներ ապրեն ազատ վշտերից ու նեղութիւններից, միմեանց հանդէպ սիրով, եղբայրութեամբ ու խաղաղութեամբ:

Ողջունաբեր այս օրը Քրիստոսի Յարութեան բերկրալի աւետիսով եւ եղբայրական սիրով ողջոյն ենք յղում Առաքելական մեր Սուրբ Եկեղեցու Նուիրապետական Աթոռների Գահակալներին` Ն. Ս. Օ. Տ. Տ. Արամ Ա Մեծի Տանն Կիլիկիոյ Կաթողիկոսին, Երուսաղէմի Հայոց Պատրիարք Ամենապատիւ Տ. Թորգոմ Արքեպիսկոպոս Մանուկեանին, Կոստանդնուպոլսի Հայոց Պատրիարք Ամենապատիւ Տ. Մեսրոպ Արքեպիսկոպոս Մութա‎‎ֆեանին, Քոյր Եկեղեցիների հոգեւոր Պետերին: Հայրապետական Մեր սէրն ու օրհնութիւնն ենք բերում մեր Սուրբ Եկեղեցու բարեջան բոլոր սպասաւորներին եւ հաւատաւոր Մեր զաւակներին ի սփիւռս աշխարհի:

Բերկրաշատ եւ յուսառատ հոգով Մեր օրհնութիւնն ու ողջոյնն ենք բերում Հայաստանի Հանրապետութեան Նախագահ Տիար Ռոբերտ Քոչարեանին, Լեռնային Ղարաբաղի Հանրապետութեան Նախագահ Տիար Արկադի Ղուկասեանին, հայոց պետական ողջ աւագանուն, Հայաստանում հաւատարմագրուած դիւանագիտական առաքելութիւնների ղեկավարներին ու ներկայացուցիչներին:

Ողջոյն ենք յղում Զատկական հոգենորոգ ու տօնական այս օրերին Երեւանում Հայկական Բարեգործական Ընդհանուր Միութեան 100-ամեակը նշելու նպատակով աշխարհի տարբեր կողմերից Մայր Հայրենիքում համախմբուած Մայր Աթոռ Սուրբ Էջմիածնի եւ Բարեգործական Ընդհանուր Միութեան բարերարներին, Միութեան Նախագահի գլխաւորութեամբ` Կենտրոնական Վարչութեան ու մասնաճիւղերի ներկայացուցիչներին:

Շնորհառատ այս օրը, սիրելի բարեպաշտ ժողովուրդ, միասնական մեր աղօթքը բարձրացնենք երկինք, որ Տիրոջ փրկութեան պարգեւը աւելի ու աւելի առատանայ աշխարհում, օգնելով մարդկանց ընթանալու դէպի Աստուծոյ բարերար Կամքը, դէպի մարդկութեան բարի ապագան` այսօր եւ միշտ եւ յաւիտեան. ամէն:

Քրիստոս յարեաւ ի մեռելոց
Օրհնեալ է Յարութիւնն Քրիստոսի