Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի Հայրապետական բարձր տնօրինությամբ Մայր Աթոռ Սբ. Էջմիածնի միաբան Տ. Անուշավան վարդապետ Ժամկոչյանը նշանակվել է Երեւանի Սբ. Գրիգոր Լուսավորիչ Մայր Եկեղեցու հոգեւոր հովիվ:

Հոգեշնորհ Հայր Սուրբը Գերմանիայի Վիլհելմի համալսարանում կանոնական իրավունքի ասպարեզում գիտությունների թեկնածուի աստիճան ստանալուց հետո վերադարձել է հայրենիք` իր հոգեւոր ծառայությունը շարունակելու Մայր Աթոռում:

* * *

Անուշավան վարդապետ Ժամկոչյան

(ավազանի անունը` Անդրանիկ)

Ծնվել է 1971-ին Էջմիածին քաղաքում:

Միջնակարգ կրթությունն ստացել է Վահան Ռշտունու անվան թիվ 11 միջն. դպրոցում:

1989-1994թթ. սովորել է Գեւորգյան Հոգեւոր ճեմարանում` պաշտպանելով ավարտաճառ «Մովսես Ջուղայեցու «Ժողովածու ի պետս բանասիրաց» թեմայով:

1993թ.-ին ձեռնադրվել է սարկավագ:

1995-ին ձեռնադրվել է կուսակրոն քահանա ձեռամբ Տ. Ասողիկ եպս. Արիստակեսյանի:

1994-98թթ. որպես ազատ ունկնդիր ուսանել է Երեւանի Կոմիտասի անվան Պետական Կոնսերվատորիայում: Միաժամանակ Գեւորգյան Հոգեւոր ճեմարանում դասավանդել է եկեղեցական երաժշտություն:

1998-2000թթ. հոգեւոր երաժշտություն է ուսանել Գերմանիայի Զագսն-Անհալտի Հալլը/Զաալը քաղաքի Բարձրագույն Ավետարանական հոգեւոր երաժշտության դպրոցում:

2000-2001թթ. Մարտին Լյութեր համալսարանում ուսանել է գերմաներեն լեզու:

2001թ. Մայր Աթոռ Ս. Էջմիածնում պաշտպանել է վարդապետական թեզ «Կոմիտասը եւ հայ եկեղեցին» թեմայով:

2001թ-ից «Իրավաբանություն եւ եկեղեցու իրավունք» է ուսանել Գերմանիայի Մարտին Լյութեր համալսարանի իրավաբանության ֆակուլտետում:

2002-2004թթ. Վիլհելմի համալսարանում ուսանել է եկեղեցու կանոնական իրավունք:

2004թ. պաշտպանել է թեկնածուական թեզ «Հայ եկեղեցու իրավունքի հիմունքները 4-20-րդ դարերում» թեմայով` կանոնական իրավունքի ասպարեզում ստանալով գիտությունների թեկնածուի աստիճան: