Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Ավագ հինգշաբթի, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, Միածնաէջ Մայր Տաճարում կատարվեց Ոտնլվայի խորհրդավոր արարողությունը:

Արարողությունն սկսվեց միասնական Տերունական աղոթքով: Այնուհետև Մայր Աթոռի միաբանների կողմից կարդացվեցին օրվա խորհրդին վերաբերող սուրբգրային հատվածները: Ընթերցվեց նաև Հովհաննես Պլուզ վարդապետի կողմից շարադրված «Սիրո մասին» խրատը:

Ապա Ամենայն Հայոց Կաթողիկոսն օրհնեց խորանի վրա դրված ջուրն ու յուղը, որից հետո Նորին Սրբությունը, Աստվածորդու օրինակով ծունկի գալով, հոգեպարար շարականների երգեցողության ներքո լվաց ու յուղով օծեց տասներկու անձանց ոտքերը:

Նրանց թվում էին Մայր Աթոռի միաբաններ Գերաշնորհ Տ. Մուշեղ եպիսկոպոս Բաբայանը և Հոգեշնորհ Տ. Զաքարիա վարդապետ Բաղումյանը, Գևորգյան հոգևոր ճեմարանի սան Հարություն սարկավագ Քեշիշյանը, զինվորներ Սամվել Մինասյանն ու Հրաչ Չոբանյանը, Երևանի պետական համալսարանի Աստվածաբանության ֆակուլտետի ուսանողներ Վահագն Գրիգորյանը և Հովհաննես Մուրադյանը, Մայր Աթոռի «Էօռնեկեան» և այլ հանրակրթական դպրոցների աշակերտներ Դավիթ Սարգսյանը, Բայանդուր Հարությունյանը, Ռուբեն Թադևոսյանը, Մելիք Կոնդյանը և Մելիք Մելիքյանը:

Վերջում օրհնված յուղը բաժանվեց հավատացյալներին: