Մայր Աթոռ Սուրբ Էջմիածնում տեղի ունեցավ «Ավանդական արժեքներ, արդի մարտահրավերներ» միջազգային համաժողովը
22.03.2018
Մարտի 22-ին Հայաստանյայց Առաքելական Ս. Եկեղեցու և Ռուս Ուղղափառ Եկեղեցու աջակցությամբ Մայր Աթոռ Սուրբ Էջմիածնի «Վաչե և Թամար Մանուկյան» Մատենադարանում, տեղի ունեցավ «Ավանդական արժեքներ, արդի մարտահրավերներ» խորագրով մեկօրյա երրորդ միջազգային համաժողովը, որը կազմակերպվել էր Աթոս լեռան ռուսական սրբավայրերի աջակցման բարեգործական հիմնադրամի կողմից:
Նախքան համաժողովի գումարումը, համաժողովի մասնակիցները Մատենադարանի ցուցասրահում դիտեցին Հայաստանի Պետական արխիվի կողմից կազմակերպված «Եկեղեցին` ընտանեկան և տոհմական հիշողության պահոց» խորագրով ցուցահանդեսը:
Համաժողովը բացվեց Տերունական աղոթքով, որից հետո լիագումար նիստի վարող «Ինտեգրացիա և զարգացում» հասարակական կազմակերպության նախագահ Արամ Սաֆարյանը կոնֆերանսի անցկացմանն աջակցություն բերելու համար մասնակիցների անունից երախտագիտություն հայտնեց Ն.Ս.Օ.Տ.Տ Գարեգին Բ Ծայրա¬գույն Պատրիարք և Ամենայն Հայոց Կաթողիկոսին և Մոսկավայի ու Համայն Ռուսիո Կիրիլ Ա Պատրիարքին:
Այնուհետև ներկաներին ողջունեց Մայր Աթոռի Սոցիալական ծառայությունների գրասենյակի տնօրեն Արժանապատիվ Տ. Մարկոս քահանա Մանգասարյանը` փոխանցելով Ամենայն Հայոց Կաթողիկոսի օրհնությունն ու բարեմաղթանքները: Տեր Հայրն ուրախությամբ արձանագրեց Հայ Առաքելական և Ռուս Ուղղափառ եկեղեցիների ներգրավվածությունը կոնֆերանսին՝ կարևորելով համաժողովին արծարծվելիք նյութերը և ավանդական արժեքների պաշտպանության գործում Եկեղեցու դերակատարությունը:
Համաժողովի մասնակիցներին ողջունեցին նաև ՀՀ ԱԺ պատգամավոր Հայկ Բաբուխանյանը, Մոսկվայի Պատրիարքության Արտաքին եկեղեցական հարաբերությունների բաժնի միջքրիստոնեական հարաբերությունների գծով քարտուղար Հոգեշնորհ Տ. Ստեֆան աբեղա Իգումնովը, Գյումրիում Մոսկվայի և Համայն Ռուսիո Պատրիարքի ներկայացուցչության տեսուչ Հոգեշնորհ Տ. Անդրեյ վարդապետ Վացը և Ռուսաստանի գիտության ու մշակույթի կենտրոնի ղեկավար Սերգեյ Ռուբինսկին և այլոք: Ընթերցվեց նաև ՀՀ-ում Ռուսաստանի Դաշնության արտակարգ և լիազոր դեսպան Իվան Վոլինկինի ուղերձը կոնֆերանսի մասնակիցներին:
Համաժողովին ավանդական, ընտանեկան արժեքների, դրանց սպառնացող մարտահրավերների, այս առնչությամբ աշխարհաքաղաքական իրողությունների ներգործության, երիտասարդության աշխարհայացքի ձևավորման վրա հեռուստատեսության և սոցիալական ցանցերի ազդեցությունների վերաբերյալ զեկույցներ ներկայացրեցին Հայաստանի և Ռուսաստանի փորձագետներ, հասարակական գործիչներ և եկեղեցականներ:
Զեկուցումներին հաջորդած քննարկումների ավարտին համաժողովի մասնակիցները շրջայց կատարեցին Մայր Աթոռ Ս. Էջմիածնում, եղան Մայր Տաճարում և թանգարաններում:
