Ամենայն Հայոց Կաթողիկոսն իր օրհնությունը բաշխեց նորընծա վարդապետներին
06.12.2018
Դեկտեմբերի 6-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց և իր օրհնությունը բաշխեց Մայր Աթոռի միաբաններ Հոգեշնորհ Տ. Անդրանիկ վարդապետ Գևորգյանին և Հնդկահայոց հոգևոր հովիվ, Կալկաթայի Հայոց Մարդասիրական ճեմարանի կառավարիչ Հոգեշնորհ Տ. Մովսես վարդապետ Սարգսյանին:
Դեկտեմբերի 3-ին պաշտպանելով իրենց վարդապետական թեզերը` վերջիններս դեկտեմբերի 6-ի առավոտյան Օշականի Սուրբ Մեսրոպ Մաշտոց եկեղեցում ձեռամբ Գերաշնորհ Տ. Նաթան արքեպիսկոպոս Հովհաննիսյանի արժանացան մասնավոր վարդապետության աստիճանի տվչության:
Հանդիպման սկզբում Նաթան արքեպիսկոպոսը Վեհափառ Հայրապետին ներկայացրեց նորընծա վարդապետներին` հույս հայտնելով, որ Եկեղեցու հոգևոր դասը պիտի ստվարանա նորանոր երիտասարդ վարդապետներով:
Այնուհետև իր հայրական օրհնությունն ու պատգամը վարդապետներին փոխանցեց Ամենայն Հայոց Կաթողիկոսը` իր ուրախությունն արտահայտելով պաշտպանության և վարդապետական աստիճանի տվչության առիթով:
Վեհափառ Հայրապետը մեծապես կարևորեց վարդապետների առաքելությունը Եկեղեցու` Ավետարանի ոգով և հայրերի ավանդության համաձայն հավատացյալների կրթության և դաստիարակության գործում:
Խոսելով վարդապետների հետագա հոգևոր սպասավորության մասին` Նորին Սրբությունը մաղթեց, որ տվչության ժամանակ ստացված շնորհներն իրենց պտուղները տան` օրհնություն դառնալով մեր ժողովրդի համար:
Նորին Սրբությունը նաև իր գնահատանքը հայտնեց վարդապետական թեզերի քննիչ հանձնախմբի անդամներին և վարդապետական աստիճանի տվչությունը կատարած Նաթան Սրբազանին:
Վերջում Ամենայն Հայոց Կաթողիկոսը «Պահպանիչ» աղոթքով օրհնեց Անդրանիկ և Մովսես վարդապետներին և նրանց ընծայեց վարդապետական լանջախաչեր:
