Ամենայն Հայոց Կաթողիկոսն ընդունեց Իրանի Մշակույթի և իսլամական կապերի կազմակերպության նախագահին
20.02.2016
Փետրվարի 20-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Իրանի Իսլամական Հանրապետության Մշակույթի և իսլամական կապերի կազմակերպության նախագահ, ԻԻՀ նախագահի խորհրդական Աբուզար Էբրահիմի Թորքամանին:
Ամենայն Հայոց Կաթողիկոսը, կարևորելով հայ-իրանական միջպետական հարաբերությունները, նշեց, որ երկու բարեկամ ժողովուրդների կյանքը հատկանշված է բազմադարյա մշակութային սերտ կապերով: Այս առիթով Նորին Սրբությունն ի դեմս պրն. Թորքամանի շնորհակալություն հայտնեց Իրանի իշխանություններին՝ մեծապես գնահատելով Իրանում հայկական հոգևոր մշակութային արժեքների նկատմամբ դրսևորվող հոգատար վերաբերմունքը:
Հանդիպմանն Աբուզար Էբրահիմի Թորքամանը ներկայացրեց ԻԻՀ Մշակույթի և իսլամական կապերի կազմակերպության նպատակները և գործունեության շրջագիծը՝ ընդգծելով աշխարհի տարբեր մշակութային և կրոնական հաստատությունների ու միջազգային մշակութային կազմակերպությունների հետ կապերի զորացման ու համագործակցության կարևորությունը:
Ամենայն Հայոց Հայրապետն ու Մշակույթի և իսլամական կապերի կազմակերպության նախագահը քննարկեցին նաև միջկրոնական երկխոսությանը վերաբերող հարցեր: Նորին Սրբությունը, մտահոգություն արտահայտելով Միջին Արևելքում տիրող իրավիճակի և մասնավորապես՝ քրիստոնեական համայնքների նվազման ու վերացման վտանգի առնչությամբ, իր հերթին անհրաժեշտ նկատեց միջկրոնական գործակցությունը՝ աշխարհի առջև ծառացած մարտահրավերների հաղթահարման, հանդուրժողականության և խաղաղ համակեցության մթնոլորտի վերահաստատման համար:
Հանդիպմանը ներկա էր Մայր Աթոռի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը:
