Ամենայն Հայոց Կաթողիկոսն ընդունեց Ավստրիայից ժամանած պատվիրակությանը
![Ամենայն Հայոց Կաթողիկոսն ընդունեց Ավստրիայից ժամանած պատվիրակությանը](https://www.armenianchurch.org/images/cache/news/2/613645163e919/7189a481d87a9291772294c2639c0dc6-1044x662.jpg)
Մայիսի 12-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Կենտրոնական Եվրոպայի և Շվեդիայի Հայրապետական պատվիրակ Գերաշնորհ Տ. Տիրան եպիսկոպոս Պետրոսյանի եպիսկոպոսական ձեռնադրության և օծման առիթով Ավստրիայից Հայաստան ժամանած պատվիրակությանը, որի կազմում էին «Պրո Օրիենտե» (Pro Oriente) եկեղեցական կազմակերպության անդամներ, Ավստրիայի Կաթոլիկ և Ասորի Ուղղափառ Եկեղեցիների հոգևորականներ և Վիեննայի Պետական համալսարանի կաթոլիկ աստվածաբանության ֆակուլտետի, ինչպես նաև պետական զանազան կառույցների ներկայացուցիչներ:
Զրույցի ընթացքում Վեհափառ Հայրապետը գոհունակությամբ փաստեց, որ Հայ Եկեղեցին ջերմ հարաբերություններ ունի Ավստրիայի եկեղեցական, միջեկեղեցական և միջպետական կառույցների հետ և իր նպաստն է բերում դրանց առավել զարգացման ու ամրապնդման գործին: Ամենայն Հայոց Կաթողիկոսն ուրախությամբ ընդգծեց նաև Մայր Աթոռի և «Պրո Օրիենտե» եկեղեցական կազմակերպության միջև ձևավորված փոխգործակցությունը:
Նորին Սրբությունը վստահություն հայտնեց, որ Կենտրոնական Եվրոպայի և Շվեդիայի Հայրապետական պատվիրակի ջանքերի միջոցով Հայ Եկեղեցու և Ավստրիայի եկեղեցական կառույցների միջև հարաբերություններն առավել կխորանան և կզարգանան:
Հանդիպմանը Ամենայն Հայոց Կաթողիկոսը իր գնահատանքն փոխանցեց Ավստրիայի իշխանություններին՝ Հայոց ցեղասպանության ճանաչման և դատապարտման հարցում որդեգրած քաղաքականության և այդ առումով հայ ժողովրդին բերած զորակցության համար:
Հայոց Հովվապետը խոսեց նաև հայ ժողովրդի կյանքում քրիստոնեական հավատքի և Հայ Եկեղեցու կարևոր դերակատարության մասին՝ շեշտելով, որ հայ ժողովուրդը պատմության ընթացքում իր զորավոր հավատքի շնորհիվ հաղթահարել է բազմապիսի փորձություններ ու դժվարություններ` կերտելով ազգային իր կյանքն ու առաջընթացը:
![](https://www.armenianchurch.org/images/albums/1/16788809374337.jpg)
![](https://www.armenianchurch.org/images/albums/1/16788809374391.jpg)
![](https://www.armenianchurch.org/images/albums/1/16788809374437.jpg)
![](https://www.armenianchurch.org/images/albums/1/16788809374466.jpg)
![](https://www.armenianchurch.org/images/albums/1/16788809374493.jpg)
![](https://www.armenianchurch.org/images/albums/1/16788809374519.jpg)
![](https://www.armenianchurch.org/images/albums/1/16788809374544.jpg)