Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Հունվարի 10-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Վեհարանի հանդիսությունների դահլիճում հանդիպեց Մայր Աթոռ Սուրբ Էջմիածնի և Հայկական Բարեգործական Ընդհանուր Միության հովանու ներքո գործող 7 Հայորդյաց տների ոլորտային տարբեր դասարանների և Մանրանկարչության կենտրոնի սաներին` ուղեկցությամբ Հայորդյաց տների հոգևոր տեսուչ Գերաշնորհ Տ. Վարդան եպիսկոպոս Նավասարդյանի, Հայորդյաց տների տնօրենների ու մանկավարժների:

Հայորդյաց տների ծրագիրը, որ մեկնարկել է 1993 թվականին նախաձեռնությամբ Արարատյան Հայրապետական թեմի առաջնորդական փոխանորդ Տ. Գարեգին արքեպիսկոպոս Ներսիսյանի և աջակցությամբ ՀԲԸՄ նախագահ տիկին Լուիզ Մանուկյան Սիմոնի, ընդարձակվելով այսօր Մայր Աթոռի և ՀԲԸՄ հովանու ներքո շարունակում է գործել Երևան, Էջմիածին, Գյումրի, Վանաձոր և Աշտարակ քաղաքներում:

Արտադպրոցական կրթության այս կենտրոններում երեխաները հնարավորություն են ստանում մասնակցելու արվեստների ու արհեստների, սպորտաձևերի և այլ մասնագիտական խմբակներին` ստանալով հիմնավոր կրթություն:

Մասնավոր ուշադրություն է դարձվում սաների հոգևոր դաստիարակությանը և ազգային նկարագրի կերտմանը:

Հայորդյաց տներ հաճախող շուրջ չորս հազար երեխաներից ու պատանիներից հանդիպմանը ներկա էին 2019 թվականին տարբեր ներհայաստանյան և միջազգային փառատոններում, մրցույթներում, ցուցահանդեսներում և մրցաշարերում մրցանակային տեղեր գրաված 289 սաներ:

Հաջողություններ արձանագրած աշակերտները Մայր Աթոռ Սուրբ Էջմիածին էին այցելել` ստանալու Նորին Սրբության օրհնությունն ու Տեր Հիսուս Քրիստոսի Սուրբ Ծննդյան բարի ավետիսը։

Հանդիպումը սկսվեց Վարդան Սրբազանի ողջույնի խոսքով: Սրբազանը Վեհափառ Հայրապետին ներկայացրեց հայորդյաց տների անցյալ տարվա հաջողությունները` ի մասնավորի անդրադառնալով տարբեր ոլորտներում սաների նվաճումներին:

Ուրախությամբ ողջունելով հայորդյաց տների սաներին` Ամենայն Հայոց Հայրապետն իր օրհնությունը, շնորհավորանքներն ու բարձր գնահատանքը բերեց նրանց և մանկավարժներին անցյալ տարի արձանագրված հաղթանակների կապակցությամբ:

Նորին Սրբությունը մաղթեց նույն խանդավառությամբ, հաղթական ոգով ու տրամադրությամբ շարունակել ուսումնական գործընթացը հայորդյաց տների հարկի ներքո և նորանոր հաջողություններ արձանագրել՝ ուրախություն պատճառելով ծնողներին, մանկավարժներին, հայորդյաց տների պատասխանատուներին և Հայոց Հայրապետին:

Ամենայն Հայոց Կաթողիկոսն աղոթքով հիշեց Հայորդյաց տների ծրագրի ակունքներում կանգնած ՀԲԸՄ նախագահ լուսահոգի տիկին Լուիզ Մանուկյան Սիմոնին, ում հովանավորությամբ, իբրև առ հայրենին և առ մեր ժողովուրդը ունեցած սիրո արտահայտություն, կյանքի կոչվեց ծրագիրը:

Նորին Սրբությունը փառք տվեց Աստծուն հայորդյաց տների բազմամյա արդյունավոր գործունեության համար, որի շնորհիվ հազարավոր երեխաներ ոչ միայն իրենց ձիրքերն ու տաղանդները կատարելագործեցին, այլև քրիստոնեական կրթություն ու դաստիարակություն ստացան՝ դառնալով ազգի արժանավոր զավակներ և առատացնելով ազգային կյանքի բարիքները:

Վեհափառը հայորդյաց տների որպես հիմնական առաքելություն նկատեց սաների մեջ ոգու և նկարագրի կերտումը, որպեսզի ապրեն ազնիվ, աստվածահաճո և օրինակելի կյանքով: «Այդ նկարագիրն ու ոգին են, որ հաղթակաների են առաջնորդելու ազգի յուրաքանչյուր զավակին: Ոգին կարևոր է և հիմնական դերակատարություն ունի անհատի կյանքում: ...Զորացրեք ձեր մեջ կամքն ու ոգին՝ միշտ հաղթանակներ արձանագրելու համար: Այդպես պիտի ծաղկի և շենանա մեր հայրենիքը, պիտի բարձրորեն հնչի մեր ժողովրդի անունը, շատերը ձեր միջոցով պիտի ավելի լավ ճանաչեն մեր երկիրը, մեր ազգի պատմությունը», - զանազան մրացանակների արժանացած մանուկներին ու պատանիներին ասաց Ամենայն Հայոց Կաթողիկոսը՝ ուրախություն հայտնելով, որ Հայոց Եկեղեցին իր լուման է ներդրել նրանց անձերի ձևավորման գործում:

Այս առնչությամբ Նորին Սրբությունը կատարվող ժրաջան աշխատանքի համար իր բարձր գնահատանքը բերեց հոգևոր տեսուչ Սրբազանին, տնօրեններին և մանկավարժներին, ապա վստահություն հայտնեց, որ նրանց հոգատար խնամքի ներքո հայորդյաց տները պիտի զորանան՝ տարեց տարի ավելացնելով սաների թիվը:

Ամենայն Հայոց Կաթողիկոսն աղոթքով հայցեց, որ Աստծո օրհնության ներքո մանուկները հասակ առնեն, զորանան՝ իրականության առաջնորդելով իրենց և նաև իրենց ծնողների իղձերն ու երազները՝ հայորդյաց տներում ուսումնառության տարիները ամուր պատվանդան դարձնելով իրենց կյանքի հետագա հաջողությունների համար:

Այնուհետև ներկաները Հայրապետական մաղթերգի կատարմամբ աղոթեցին Ամենայն Հայոց Հայրապետի կենաց արևշատության և Մայր Աթոռ Սուրբ Էջմիածնի անսասանության համար, ապա Գարեգին Երկրորդ Կաթողիկոսին Տիրոջ Սուրբ Ծննդյան տոնի առիթով ընծայեցին իրենց ձեռագործ աշխատանքները: