«Ֆրեսկո» փառատոնի ժյուրիի անդամների այցը Մայր Աթոռ Սուրբ Էջմիածին
22.06.2014
Հունիսի 21-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց հոգևոր ֆիլմերի և արդի արվեստի «Ֆրեսկո» փառատոնի ժյուրիի անդամներին ու հյուրերին` գլխավորությամբ Արարատյան Հայրապետական թեմի առաջնորդական փոխանորդ Տ. Նավասարդ արքեպիսկոպոս Կճոյանի և Ռուս Ուղղափառ Եկեղեցու ներկայացուցիչներ Միքայել եպիսկոպոս Լոնգինի և պատմաբան Հայր Իոան Գուայտայի: Հանդիպմանը ներկա էր նաև փառատոնի հոգևոր խորհրդատու և պատասխանատու Արարատյան Հայրապետական թեմի հոգևոր սպասավոր, Սուրբ Երրորդություն եկեղեցու հոգևոր հովիվ Տ. Եսայի քահանա Արթենյանը: Ամենայն Հայոց Կաթողիկոսն իր հայրական օրհնությունն ու գնահատանքը փոխանցեց հոգևոր ֆիլմերի փառատոնի կազմակերպիչներին, որի նպատակն է հոգևոր-մշակութային երկխոսության միջոցով հանրության մեջ նպաստել սիրո, համերաշխության ու մարդասիրական արժեքների ամրապնդմանը և հոգևոր արժեքների տարածմանը: Նորին Սրբությունը մասնավոր կերպով ընդգծեց հանրության կյանքից ներս նման նախաձեռնությունների իրականացման անհրաժեշտությունը, որոնք, ի հեճուկս ներկա ժամանակներում հոգևոր-բարոյական արժեքների տկարացման և աշխարհիկացման գործընթացների, հասարակական գիտակցության մեջ քարոզում են խաղաղություն, հանդուրժողականություն, մարդասիրություն և համամարդկային այլ արժեքներ: Ամենայն Հայոց Հայրապետը կարևորեց նաև այն, որ փառատոնի շրջանակներում իրենց գործուն մասնակցությունն են ունենում մեծ թվով հոգևորականներ: Նորին Սրբությունը վստահություն հայտնեց, որ համատեղ կազմակերպված ՙՖրեսկո՚ փառատոնն իր բարերար ներգործությունը կունենա հայ հասարակության կյանքում, իսկ փառատոնի անդամներն ու հյուրերը հաղորդ կդառնան հայ ժողովրդի հոգևոր արժեքներին և նրա հարուստ հոգևոր-մշակութային ժառանգությանը:
Հանդիպմանը «Ֆրեսկո» փառատոնի ժյուրիի անդամներն ու հյուրերը, շնորհակալություն հայտնելով Ամենայն Հայոց Հայրապետին Մայր Աթոռում ջերմ ընդունելության համար, տեղեկացրեցին, որ փառատոնին կներկայացվեն շուրջ 57 ֆիլմեր աշխարհի 17 երկրներից:
Վերստին իր գոհունակությունը հայտնելով հոգևոր ֆիլմերի փառատոնի նախաձեռնողներին` Նորին Սրբությունը փառատոնին մաղթեց բարի ընթացք:
