Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Մեծարգո Վարչապետ Հայաստանի Հանրապետության,

Սիրելի Հայր Եղիա Վրդ. Քիլաղպյան, Մխիթարյան միաբանության Ընդհանուր Աբբահայր,

Հարգելի տիկնայք եւ պարոնայք:

Հոգու առանձնակի խնդությամբ Մայր Աթոռ Սուրբ Էջմիածնից գալիս ենք ողջունելու Հայ-իտալական բարեկամության օրերի ծրագիրը, որն իրականացվում է Հայաստանի Հանրապետության եւ Իտալիայի Հանրապետության Նախագահների բարձր հովանավորությամբ: Հայրապետական Մեր օրհնությունն ենք բերում այս գեղեցիկ նախաձեռնության եւ ընդարձակ ծրագրի բարերարներին, կազմակերպիչներին ու բոլոր մասնակիցներին:
Հնագույն մեր երկու ժողովուրդների դարավոր բարեկամության դրսեւորմանն ու ամրապնդմանն ուղղված միջոցառումները մեկ ամիս շարունակ տոնականությամբ են համակելու Երեւանը եւ մեր մշակութասեր հասարակությանը:
Հիրավի, դարերի խորքից են գալիս առնչություններն ու բարեկամությունը քրիստոնյա մեր ժողովուրդների: Առեւտրական ու տնտեսական կապերին ժամանակի հետ գումարվել են ու լայնորեն զարգացել մանավանդ մշակութային սերտ հարաբերությունները` թողնելով թանկ ու նվիրական հիշատակներ: Հայտնի է, որ Հայաստանի համար դժվարին ժամանակներում մեր ժողովրդի զավակները հանգրվանել են նաեւ Իտալիայի հողում, զբաղվել արհեստներով, վաճառականությամբ, նավաշինությամբ ու նավագնացությամբ, ինչի մասին տեղեկություններ են պահպանվել հայկական ձեռագրերի հիշատակարաններում: 12–13-րդ դարերից հայկական համայնքներ են եղել Հռոմում, Միլանում, Ֆլորենցիայում, Լիվոռնոյում, Վենետիկում, Պիզայում եւ այլուր: Իտալական մեծ նավահանգիստներն ու քաղաքները տնտեսական աշխույժ կապեր են ունեցել Կիլիկյան Հայաստանի հետ, հայ վաճառականների հետ` մինչեւ Իրան ու Հնդկաստան: Այս տեւական առնչությունները մերձեցրել են մեր ժողովուրդներին եւ փոխադարձաբար հարստացրել: Մեր ժողովրդին իր բարձր զարգացած արվեստով, մշակույթով ու գիտությամբ մշտապես հետաքրքրել է Իտալիան, ուր այցելել եւ ուսանել են եկեղեցական ու աշխարհական շատ նշանավոր հայորդիք: Իտալական հողից է սկիզբ առնում հայ տպագրությունը, որը ինչպես բոլոր ժողովուրդների կյանքում, նշանակալի իրադարձություն եղավ նաեւ հայոց պատմության մեջ: Երբ Հայաստանը հեծում էր օտարի անողոք լծի ներքո, Վենետիկում լույս տեսավ հայերեն առաջին տպագիր գիրքը, Հռոմն ու Լիվոռնոն դարձան հայ տպագրության օրրաններ: Հայ մշակույթին անփոխարինելի վաստակ է մատուցել Վենետիկի Մխիթարյան միաբանությունը` 300-ամյա հսկայածավալ գիտական ժառանգությամբ: Մխիթարյան գիտնական միաբանների համաստեղությունը միշտ լուսավորելու է հայ մշակույթի երկինքը եւ երախտագիտությամբ է հիշվելու մեր ժողովրդի հոգում: Նոր ժամանակներում առավել ընդարձակ են հայ -իտալական մշակութային առնչությունները` օպերայի, թատերական եւ կինո արվեստում, ճարտարապետության, հոգեւոր ու աշխարհիկ երաժշտության, գեղարվեստի եւ այլ ասպարեզներում: Եվ Մենք հավատում ենք, որ հայ-իտալական օրերը մեծ խանդավառություն են պարգեւելու միջոցառումների մասնակիցներին եւ նոր լիցք ու զորություն են հաղորդելու մեր ժողովուրդների բարեկամությանը եւ մեր պետությունների հարաբերություններին:
Աղոթք ենք բարձրացնում երկինք, որ Բարձյալն Աստված խաղաղության մեջ պահպանի աշխարհը համայն եւ օրհնի ժողովուրդների միջեւ բարեկամության ճանապարհները: Բարի սկիզբ ու ընթացք ենք մաղթում Հայաստանում հայ-իտալական բարեկամության օրերին եւ ստեղծագործական հաջողություններ` մասնակից արվեստագետներին:
Շնորք եւ սէր մեր Տիրոջ Յիսուսի Քրիստոսի եղիցին ընդ ձեզ եւ ընդ ամենեսեանն. ամէն: