Մայր Աթոռ Սուրբ Էջմիածնում տեղի ունեցավ Արևելյան Ուղղափառ Եկեղեցիների պետերի հանդիպում
23.04.2015
Ապրիլի 23-ին Մայր Աթոռ Սուրբ Էջմիածնում տեղի ունեցավ Արևելյան Ուղղափառ Եկեղեցիների Հովվապետերի` Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, Ն.Ս.Օ.Տ.Տ. Արամ Ա Մեծի Տանն 
Կիլիկիո Կաթողիկոսի, Ալեքսանդրիայի Պապ և Համայն Աֆրիկայի Պատրիարք Նորին Սրբություն Թավադրոս Բ-ի, Ասորի Ուղղափառ Եկեղեցու և Համայն Արևելքի Պատրիարք Նորին Սրբություն Մորան Մոր Եփրեմ Բ-ի և Մալանկարա Ուղղափառ Եկեղեցու պետ և Մալանկարայի Մետրոպոլիտ Նորին Սրբություն Բասելիոս Մար Թոմա Պաուլոս Բ-ի հանդիպումը:
Զրույցի ընթացքում Գարեգին Բ Ամենայն Հայոց Կաթողիկոսը ուրախություն հայտնեց Արևելյան Ուղղափառ Եկեղեցիների հոգևոր պետերի այս հանդիպման կապակցությամբ` ընդգծելով, որ 1965 թ. Ադիս Աբեբայի 
հանդիպումից հետո նման հնարավորություն չի ընձեռվել: Նորին Սրբությունը նաև իր շնորհակալական խոսքն ուղղեց վերջիններիս Հայոց Ցեղասպանության նահատակների սրբադասման արարողության առիթով Հայաստան ժամանելու առիթով:
Իր հերթին Արամ Ա Մեծի Տանն Կիլիկիո Կաթողիկոսը, ողջունելով Քույր Եկեղեցիների առաջնորդներին, ներկայացրեց սրբադասման արարողության կարևոր նշանակությունը:
Հանդիպման ընթացքում հովվապետերը քննարկեցին Արևելյան Ուղղափառ Քույր Եկեղեցիների ընտանիքին հուզող խնդիրները, անդրադարձ կատարեցին մասնավորապես Եկեղեցիների հավատացյալների առջև ծառացած մարտահրավերներին: Կարևոր նկատվեց, որ վերականգնվի Արևելյան Ուղղափառ Եկեղեցիների պետերի 
պարբերական հանդիպումների ավանդությունը, ինչը կարևոր խթան կլինի համագործակցության զորացման համար:
Ղպտի, Ասորի և Մալանկարա Եկեղեցիների առաջնորդները ևս գոհունակություն հայտնեցին Հայոց Ցեղասպանության նահատակների սրբադասման արարողությանը ներկա գտնվելու կապակցությամբ և իրենց հերթին վերահաստատեցին Քույր Եկեղեցիների հովվապետերի հանդիպումների կարևորությունը:
