Մայր Աթոռ Ս. Էջմիածնում տեղի ունեցավ կիրակնօրյա դպրոցների ուսուցիչների հավաք
Նոյեմբերի 28-ին, օրհնությամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի և նախաձեռնությամբ Մայր Աթոռի Քրիստոնեական դաստիարակության կենտրոնի (ՔԴԿ), Ս. Թադեոս և Ս. Բարդուղիմեոս առաքյալների տոնի առիթով Մայր Աթոռ Սուրբ Էջմիածնում տեղի ունեցավ հայաստանյան թեմերի կիրակնօրյա դպրոցների ուսուցիչների հավաք:
Կիրակնօրյաներում կրոն դասավանդող շուրջ 200 ուսուցիչներ մասնակցեցին օրվա խորհրդով Մայր Տաճարում մատուցված Ս. Պատարագին, ապա հանդիպում ունեցան Գարեգին Բ Ամենայն Հայոց Կաթողիկոսի հետ:
Հայաստանի Աստվածաշնչային ընկերության հետ համատեղ իրականացվող «Աստվածաշունչ դպրոցներին» ծրագրի շրջանակներում կազմակերպված հանդիպման սկզբում համազգային եկեղեցական իրադարձության` Ս. Թադեոս և Ս. Բարդուղիմեոս առաքյալների տոնի կապակցությամբ Նորին Սրբությանը և ներկա ուսուցիչներին շնորհավորեց ՔԴԿ տնօրեն Գերաշնորհ Տ. Վարդան եպիսկոպոս Նավասարդյանը:
Սրբազանն իր խոսքում ընդգծեց, որ կիրակնօրյա դպրոցների ուսուցիչները հոգևորականների աշխարհական լծակիցներն են. մեծ նվիրումով ու նախանձախնդրությամբ իրենց ծառայությունն են բերում Հայոց Եկեղեցուն և հայ ժողովրդին:
Այնուհետև ներկաներին իր օրհնությունը բերեց Ամենայն Հայոց Կաթողիկոսը:
Նորին Սրբությունն ուսուցիչների համախմբման համար իր ուրախությունն արտահայտեց` ընդգծելով, որ կիրակնօրյա դպրոցների մանկավարժները հոգևորականների հետ միասին առաքելական գործի շարունակողներն են` կոչված ուսուցանելու Քրիստոսի Ավետարանը:
Գարեգին Բ Հայրապետը բարձր գնահատեց ուսուցիչների ծառայությունը` նշելով, որ նրանք իրենց հոգու հավատքի ապրումն են փոխանցում մատաղ սերնդին, որպեսզի վերջինս ճանաչի և սիրի մեր Տիրոջը և Փրկչին, հավատարմորեն ապրի Աստծու պատգամներով ու պատվիրաններով, սիրի Եկեղեցին:
Նորին Սրբությունը հավելեց, որ նրանց ուսերին է ծանրացած Հայ Եկեղեցու արժանավոր զավակներ և Հայրենիքի օրինակելի քաղաքացիներ կրթելու և դաստիարակելու պարտականությունը` Աստծո հովանին ու օրհնությունը հայցելով ուսուցիչների պատվավոր առաքելությանը:
Վեհափառ Հայրապետը նաև իր գնահատանքը հայտնեց հանդիպմանը ներկա Հայաստանի Աստվածաշնչային ընկերության գլխավոր քարտուղար Գերաշնորհ Տ. Եզնիկ արքեպիսկոպոս Պետրոսյանին և ընկերության ծրագրերի պատասխանատու Արշավիր Գաբուջյանին ընկերության կողմից իրականացվող զանազան ծրագրերի համար, որոնք նպաստում են հավատքի զորացմանը և ավետարանական ճշմարտությունների փոխանցմանը:
Հանդիպումից հետո «Վաչե և Թամար Մանուկյան» մատենադարանում «Աստվածաշունչ դպրոցներին» ծրագրի շրջանակներում տեղի ունեցավ քննարկում Տ. Եզնիկ արքեպիսկոպոս Պետրոսյանի և Տ. Վարդան եպիսկոպոս Նավասարդյանի հետ, որի ավարտին Աստվածաշնչեր բաշխվեցին ուսուցիչներին: