Մայր Աթոռ Ս. Էջմիածին ժամանեց Ասորի Ուղղափառ Եկեղեցու հոգևոր պետը
10.10.2014
Հոկտեմբերի 10-ի երեկոյան, հրավերով Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, եղբայրական եռօրյա այցով Հայաստան ժամանեց Անտիոքի և Համայն Արևելքի նորընտիր Պատրիարք Նորին Սրբություն Մոր Իգնատիուս Եփրեմ Երկրորդը: Ասորի Ուղղափառ Եկեղեցու հոգևոր պետին ուղեկցում են Տրիպոլիի և Լեռնային Լիբանանի արքեպիսկոպոս, Ս. Սինոդի գլխավոր քարտուղար Մոր Թեոփիլոս Սալիբան, Հոմսի արքեպիսկոպոս Մոր Սիլվանոս Բուտրոս ալ Նեհմեհը, պատրիարքական քարտուղար Մոր Տիմոթեոս Մաթթա ալ Խուրին, Հայր Կարլոս Բաբին և Հայր Ջոզեֆ Բալին:
«Զվարթնոց» միջազգային օդանավակայանում Անտիոքի և Համայն Արևելքի Պատրիարքին գլխավորությամբ Նորին Սրբություն Գարեգին Բ Ամենայն Հայոց Կաթողիկոսի դիմավորեցին Տ. Նաթան արքեպիսկոպոս Հովհաննիսյանը, Մայր Աթոռի Միջեկեղեցական հարաբերությունների բաժնի տնօրեն, Արթիկի թեմի առաջնորդ Տ. Հովակիմ եպիսկոպոս Մանուկյանը, Մայր Աթոռի Վարչատնտեսական բաժնի տնօրեն Տ. Մուշեղ եպիսկոպոս Բաբայանը և Միջեկեղեցական հարաբերությունների բաժնի Ծիսահայեցակարգային հարցերի գրասենյակի պատասխանատու Տ. Զաքարիա վարդապետ Բաղումյանը:
Մայր Աթոռ Ս. Էջմիածնում քույր Եկեղեցիների հովվապետերը «Հրաշափառ» շարականի երգեցողության և զարգերի ղողանջների ներքո թափորով առաջնորդվեցին Քրիստոսահիմն Մայր Տաճար, ուր Իջման Ս. Սեղանի առջև կատարվեց միասնական գոհաբանական աղոթք:
Աղոթքից հետո Գարեգին Բ Ամենայն Հայոց Հայրապետը բարիգալստյան խոսքով դիմեց Անտիոքի և Համայն Արևելքի Պատրիարքին և նրա պատվիրակությանը: Որախություն հայտնելով Հայաստան և համայն հայության հոգևոր 
կենտրոն Քույր Եկեղեցու հոգևոր պետի ժամանման առիթով` Նորին Սրբությունը մասնավորապես ասաց. «Մեր ուրախությունն առավել է, քանզի ճանաչում ենք Ձեզ որպես քաջ և անձնազոհ առաջնորդի, եղբայրասեր ու մեծ հոգի ունեցող անձի, որին այլևս հյուրընկալում ենք, որպես հոգևոր պետի: Ձեր այցելությունը սկսում է «Հրաշափառի» բարի գալստյան արարողությամբ, աղոթքով Միածնաէջ այս տաճարում: Միասնական մեր աղոթքը վկայությունն է մեր քույր Եկեղեցիների հավատքի միության և ոգին է քրիստոնեական վկայության՝ հիմնված մեր սուրբ հայրերի կողմից մեզ ավանդված սրբազան ավանդության վրա: Մենք, որպես երկնավոր Հոր հարազատ զավակներ, միասնաբար դիմում ենք մեր Տեր Աստծուն: Պողոս առաքյալի խոսքերով, որպես «Եղբայրնե՛ր, խոստման որդիներ» (Գաղատ. Դ 28):
Հայ Առաքելական Եկեղեցու և Ասորի Ուղղափառ Եկեղեցու դարավոր հարաբերությունները հատկանշված են եղել քրիստոնեական սիրո, եղբայրության և գործակցության ոգով: Ձեր այցելությունը, որպես նորընտիր գահակալ մեր քույր Եկեղեցու, հաստատումն է այս իրողության: Փոխհարաբերությունների զորացումը մեր քույր Եկեղեցիների հրամայական անհրաժեշտություն է այս օրերին, մանավանդ, երբ մեր երկու Եկեղեցիները՝ Ասորի Ուղղափառ Եկեղեցին և Հայաստանյայց Առաքելական Սուրբ Եկեղեցին, կանգնած են մեր հավատավոր զավակների կյանքը վտանգող և աշխարհը մտահոգող իրավիճակների առաջ:
Սիրեցյալ եղբայր ի Քրիստոս, հակառակ Սիրիայում ընթացող ռազմական գործողությունների և Մերձավոր Արեւելքում ստեղծված ծանր վիճակի, Դուք որպես անձնազոհ և նվիրյալ հոգևորական, որպես քաջ հովիվ, Միացյալ Նահանգներից վերադարձաք հայրենի Սիրիա, անձնվիրաբար հանձն առնելով հովվապետի ծանր լուծը, որպեսզի պատմական այս բարդ շրջանում առավել չափով ու նվիրումով ծառայեք Ձեր ժողովրդին: Ձեր ներկայությունը Սիրիայում և Ձեր ծավալած գործունեությունը հանուն խաղաղության քաջալերանք է բոլոր հավատացյալների համար, որոնց գերագույն ձգտումն ու նպատակը խաղաղության ու կայունության անհապաղ հաստատումն է, արդարության հաղթանակը` ընդդեմ ահաբեկչության ու պատերազմի չարիքի: Մենք մեր զորակցությունն ենք 
բերում Ձերդ Սրբությանը և Ձեր անձի միջոցով Սիրիայի ժողովրդին՝ առ Աստված աղոթքով, որ դադարեն ռազմական գործողությունները և Սիրիայի եղբայրական ժողովուրդը լծվի ավերված քաղաքների վերաշինման, իր շեն, բարօր ու երջանիկ կյանքի կերտման գործին»:
Հանուն Հայաստանյայց Առաքելական Սուրբ Եկեղեցու Գերագույն հոգևոր խորհրդի, հոգևորականաց դասի և հավատացյալ ողջ ժողովրդի բարի գալուստ մաղթելով Ասորի Եկեղեցու գահակալին` Ամենայն Հայոց Հայրապետն աղոթքով հայցեց, որ Բարին Աստված Իր Սուրբ Աջի Ամենախնամ հովանու ներքո պահի ու պահպանի Սիրիան և Հայաստանի Հանրապետությունը, Ասորի Ուղղափառ և Հայ Առաքելական Եկեղեցիները, Իր օրհնությամբ առավել արդյունավորի փոխհարաբերություններն ու համագործակցությունը երկու Եկեղեցիների՝ Սուրբ Հոգու երկնառաք պարգևներով առատապես շնորհազարդելով բարեպաշտ զավակներին՝ հայ և ասորի եղբայր ժողովուրդներին: Վեհափառ Հայրապետը նաև մաղթեց, որ Տերը քաջառողջ կյանք և գահակալության երկար տարիներ պարգևի Նորին Սրբություն Մոր Իգնատիուս Եփրեմ Բ-ին:
Այնուհետև Հայաստան և Մայր Աթոռ իր այցին անդրադարձավ Նորին Սրբություն Մոր Իգնատիուս Եփրեմ Երկրորդը: Շնորհակալություն հայտնելով ջերմ ընդունելության համար` Ասորի Ուղղափառ Եկեղեցու հոգևոր պետն ուրախությամբ ընդգծեց, որ իր գահակալությունից հետո առաջին հովվապետական այցը կատարում է Հայաստանյայց Առաքելական քույր Եկեղեցուն: «Մեր խոնարհումն ենք բերում այն վայրում, որտեղ 1700 տարիներ առաջ իջավ Աստծու Միածին Որդին և իր փառքով լցրեց հայ ժողովրդի հոգին: Ուրախ ենք այցելել Հայ Եկեղեցուն և Ձերդ Սրբությանը, որովհետև մենք կիսում ենք ձեզ հետ ոչ միայն հավատը, այլև արյունը: …Եկել ենք այս օրերին մեր երախտագիտությունը հայտնելու Ձեզ` հայ ժողովրդի Ձեր հոգևոր առաջնորդության համար, եկել ենք աղոթելու ոչ միայն Սիրիայի, այլև համայն աշխարհի խաղաղության համար», - նշեց Ասորի Ուղղափառ Եկեղեցու հովվապետը: Նորին Սրբություն Մոր Իգնատիուս Եփրեմ Բ Պատրիարքը խոսեց նաև Սիրիայում և Մերձավոր Արևելքում քրիստոնյաների առջև ծառացած մարտահրավերների մասին` հավելելով, որ դժվարին այս ժամանակներում հոգևոր առաջնորդների պարտականությունն է հույս ներշնչել իրենց համայնքներին: «Հավատն ի Քրիստոս և վստահությունը մեր հոգևոր եղբայրների հանդեպ զորացնում է մեզ` շարունակելու մեր քրիստոնեական վկայությունը», - ընդգծեց Եփրեմ Բ Պատրիարքը` այս առիթով իր շնորհակալությունը հայտնելով Ամենայն Հայոց Կաթողիկոսին` Սիրիայի բարեպաշտ ժողովրդին և մասնավորապես Ասորի Ուղղափառ Եկեղեցուն մշտապես ցուցաբերվող զորակցության համար:
Բարիգալստյան արարողությունն ավարտվեց միասնական Տերունական աղոթքով:
Արարողությունից հետո Հին Վեհարանի ընդունարանում, մասնակցությամբ երկու Եկեղեցիների պատվիրակությունների և Մայր Աթոռում պաշտոնավարող եպիսկոպոսների, տեղի ունեցավ հանդիպում, որի ընթացքում Ամենայն Հայոց Հայրապետը վերստին իր ուրախությունը հայտնեց Ասորի Ուղղափառ Եկեղեցու հովվապետի այցի առիթով` վստահությամբ ընդգծելով, որ այն պիտի նպաստի երկու Քույր Եկեղեցիների հարաբերությունների առավել սերտացմանը:
