«Իզմիրլյան» բժշկական հաստատության և Սուրբ Ներսես Մեծ գիտաբժշկական կենտրոնի բացումը
15.10.2013
Հոկտեմբերի 15-ին Երևանում տեղի ունեցավ Իզմիրլյան բժշկական հաստատության և Սուրբ Ներսես Մեծ գիտաբժշկական կենտրոնի վերաբացման արարողությունը` հանդիսապետությամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի և ներկայությամբ ՀՀ նախագահ Սերժ Սարգսյանի ու ազգային բարերարներ շվեյցարահայ տեր և տիկին Տիգրան և Հելենա Իզմիրլյանների:
Արարողությանը ներկա էին Մայր Աթոռի միաբաններ, Իզմիրլյան ընտանիքի անդամներ, ՀՀ պետական այրեր, առողջապահության ոլորտի ներկայացուցիչներ, Իզմիրլյան հիմնադրամի պաշտոնեությունը, նորաբաց հաստատության աշխատակազմը և հյուրեր:
Հայ Եկեղեցու հովանու ներքո գործող բժշկական այս հաստատությանն ի նպաստ` «Իզմիրլյան» հիմնադրամի և տիկին Լուիզ Մանուկյան Սիմոնի բարերարությամբ իրականացվել է 12 մլն ԱՄՆ դոլարի ծրագիր, որի շնորհիվ հիվանդանոցը հիմնանորոգվել է և համալրվել նոր մասնաշենքով:
«Իզմիրլյան» բժշկական կենտրոնի նորակառույց մասնաշենքի առջև պատվավոր հյուրերին աղ ու հացով դիմավորեցին Արաբկիրի Հայորդյաց տան սաները, ապա Իզմիրլյան ամուսինները հատեցին բժկական հաստատության մուտքի ժապավենը:
Այնուհետև բժշկական կենտրոնի ընդարձակ նախասրահում նախագահությամբ Ամենայն Հայոց Հայրապետի կատարվեց նորաբաց հաստատության օրհնության կարգ, որից հետո ներկաներին ներկայացվեցին Իզմիրլյան բժշկական հաստատության և Սուրբ Ներսես Մեծ գիտաբժշկական կենտրոնի հիմնանորոգության աշխատանքները, պայմաններն ու ձեռք բերված ժամանակակից բժշկական սարքավորումները:
Շրջայցի ավարտին հաստատության հանդիսությունների սրահում արարողության մասնակիցներին ողջունեց կենտրոնի տնօրեն բժշկական գիտությունների դոկտոր, պրոֆեսոր Արմեն Մուրադյանը` մասնավոր ուրախություն հայտնելով հիվանդանոցի հիմնական բարերար Տիգրան Իզմիրլյանի և իր ընտանիքի անդամների ներկայության համար: Տիար Արմեն Մուրադյանը իր երախտագիտությունը արտահայտեց Վեհափառ Հայրապետի կողմից հաստատության նկատմամբ դրսևորվող հոգատարության և ազգային բարերարներ Տիգրան Իզմիրլյանի և Լուիզ Մանուկյան Սիմոնի պատրաստակամ հանձնառության համար, ինչի շնորհիվ հնարավոր դարձավ Հայաստանում ժամանակակից, բարձր տեխնոլոգիաների կիրառությամբ բժշկական կենտրոնի բացումը: Կենտրոնի տնօրենն իր խոսքում անդրադարձավ նաև հաստատության բշժկական անձնակազմի կողմից իրականացվող սոցիալական ծրագրերին և հիվանդներին մատուցվող ծառայությունների զարգացման հեռանկարներին:
Այնուհետև արարողության մասնակիցները դիտեցին «Շողակաթ» հեռուստաընկերության կողմից պատրաստված «Իզմիրլյան բժշկական կենտրոն. անցյալը և ներկան» ֆիլմը կենտրոնի անցյալի, ներկայիս գործունեության վերակազմակերպման և առաքելության մասին:
Ողջույնի խոսքով ներկաներին դիմեց նաև «Իզմիրլյան» հիմնադրամի ավագ փոխնախագահ Գրեգորի Ջերեջյանը՝ անդրադառնալով հիմնադրամի կողմից Հայաստանում իրականցված բազմաբնույթ ծրագրերին:
Ապա հայրապետական իր օրհնությունն ու գնահատանքը ներկաներին բերեց Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը:
«Մեծ ուրախությամբ կատարեցինք բացման արարողությունը հիմնանորոգված «Իզմիրլյան» բժշկական կենտրոնի։ Գոհունակություն է Մեզ համար անդրադառնալ, որ այս կարևոր միջացառմանը մասնակից է նաև Հայաստանի Հանրապետության նախագահ տիար Սերժ Սարգսյանը, ով իր բարձր և պատասխանատու առաքելության ընթացքին մշտապես մեծ զորակցություն ու կարևոր աջակցություն է ցուցաբերում նաև բարեսիրական, խնամատար ծրագրերի իրականացմանը:
Սիրելիներ, շուրջ մեկ տասնամյակ առաջ Հայկական Բարեգործական Ընդհանուր Միությունը Մայր Աթոռ Սուրբ Էջմիածնին նվիրաբերեց նախկին Պրոկտոլոգիայի ինստիտուտը, որը տարիներ շարունակ դժվարին իրավիճակներում ծառայություններ մատուցեց` բարեկարգ պայմաններում գործունեություն իրականացնելու այս բերկրալի օրը հուսալով։ Բժշկական կենտրոնի հիմնանորոգմանը սրտաբուխ բարերարությամբ մեծ ներդրում բերեցին մեր Սուրբ Եկեղեցու նվիրյալ զավակներ Տեր և Տիկին Տիգրան և Հելենա Իզմիրլյանները` որպես հիմնական բարերար, ինչպես նաև մեծազնիվ տիկին Լուիզ Մանուկյան Սիմոնը զգալի ներդրում կատարեց այս աստվածահաճո գործի իրականացման համար: Մեր սիրելի բարերարները ազգային-եկեղեցական կյանքի բարգավաճմանն ու շինությանն ի խնդիր իրենց մեծագործություններին հավելեցին նաև առատաձեռն նվիրաբերություններով իրականացված այս հիվանդանոցի նորոգությունը, որը, ի հիշատակ բարերար Տիգրան Իզմիրլյանի լուսահոգի ծնողներ Սարգիս և Մարի Իզմիրլյանների, կոչվեց «Իզմիրլյան» բժշկական կենտրոն: Հիվանդանոցի վերանորոգմամբ և բարեկարգ պայմանների ստեղծմամբ գործունեության նոր սկիզբ է դրվում հոգատարության ու խնամքի այս հաստատության, որը հիրավի բազմաթիվ մարդկանց համար պիտի լինի «տեղի ապաւինի եւ բժշկութեան»։Այսօր վերակերտյալ հիվանդանոցի բացումը կատարեցինք այս վստահությամբ և սպասումով, որ բժշկական հաստատությունը առավել արդյունավորությամբ շարունակի մեծ օգտակարություն բերել բժշկության կարիքն ունեցող մարդկանց:
Փառք և գոհություն Աստծո, որ Մեր զավակների առողջության, հոգածության ու խնամքի համար հնարավոր եղավ կյանքի կոչել «Իզմիրլյան» բժշկական կենտրոնի ստեղծման ազգօգուտ ծրագիրը: «Իզմիրլյան» հիմնադրամի աջակցությամբ հիմնանորոգված «Իզմիրլյան» բժշկական հաստատությունն իր մեջ ներառում է նաև «Սուրբ Ներսես Մեծ» գիտակրթական կենտրոնը: Հիվանդանոցը «Սուրբ Ներսես Մեծ» գիտակրթական կենտրոնով պիտի գործի Սուրբ Ներսես Մեծ Կաթողիկոսի կյանքի վառ օրինակով, ով իր առաքելությունը բարեզարդեց նաև խնամատար, բարեսիրական գործունեությամբ և ամրապնդեց մեր Սուրբ Եկեղեցու սոցիալական ծառայության հիմքերը: Այս սկզբունքով «Իզմիրլյան» բժշկական կենտրոնը շարունակելու է մատուցել բժշկական ծառայությունների բարձր որակ և մատչելիություն, նաև բարեգործական սկզբունքով` ծառայություններ շրջաններում և քաղաքամայր Երևանում սոցիալապես անապահով հիվանդների համար:
Մեր Տերը` Հիսուս Քրիստոս, Իր փրկչական առաքելության մեջ հատուկ ուշադրություն էր դարձնում նաև հիվանդների բժշկությանը, ինչպես վկայում է Ավետարանիչը` նշելով, որ Տերը քարոզում էր արքայության Ավետարանը և բժշկում էր ժողովրդի մեջ եղած բոլոր հիվանդությունները (Մատթ. Դ 23): Մեր սուրբ հայրերը հոգու փրկության հետ մեծապես կարևորել են երկրային այս կյանքում մարմնի առողջության համար հոգալը: Մարդու կյանքի և արդյունալի գործունեության նախապայման է առողջությունը: Քրիստոս ասում է. «Հոգին առավել է, քան կերակուրը, և մարմինը` քան հագուստը» (Ղուկ. ԺԲ 23): Մեր Տիրոջ վարդապետության կարևոր ուսուցումներից է ներկայացնում ավետարանական այս խոսքը, որով Քրիստոս հոգևորի հետ մեկտեղ նաև մարմնի մասին է հիշատակում: Հիրավի, պարտավոր ենք հոգևորն արժևորելով մարմնի մասին մտածել, առողջության համար հոգալ, քանզի մարդը միայն հոգի չէ, և ոչ էլ սոսկ մարմին, այլ այս երկուսի միավորությամբ է` ստեղված աստվածային պատկերով և նմանությամբ: Դրա համար Սուրբ Եկեղեցին հոգու փրկության առաքելության իրականացմամբ մշտապես կարևորել է նաև մարդու ֆիզիկական առողջության համար հոգատարությունը, քանզի աստվածաշնորհ կյանքը բարի գործերով առավել կարող ենք արժևորել, երբ զորեղ ենք առողջությամբ», - նշեց Վեհափառ Հայրապետն իր խոսքում:
«Իզմիրլյան» բժշկական կենտրոնի բացման ուրախալի առիթով Վեհափառ Հայրապետն իր գնահատանքը հայտնեց «Իզմիրլյան» բժշկական կենտրոնի հիմնանորոգման նախաձեռնությանը մեծ օգտակարություն ցուցաբերած բոլոր անձանց, «Այգեձոր» շինարարական ընկերությանը, ճարտարապետներին և հիվանդանոցի քաջեռանդ բժիշկներին ու աշխատակիցներին:
Ի գնահատություն Մայր Աթոռ Ս. Էջմիածնին մատուցած բացառիկ ծառայությունների և ազգային-եկեղեցական անդաստանում իրականացրած ազգանվեր ձեռնարկների համար` Նորին Սրբությունը տիար Տիգրան Իզմիրլյանին շնորհեց «Ասպետ Ս. Էջմիածնի» տիտղոս և Հայրապետական շքանշան:
Ապա ներկաներին իր սրտի խոսքն ասաց Տիգրան Իզմիրլյանը: Ազնվահոգի բարերարն իր ուրախությունը հայտնեց ի հիշատակ իր ծնողների՝ Սարգիս և Մարի Իզմիրլյանների, հիմնովին վերանորոգված կենտրոնի բացման առիթով՝ ընդգծելով, որ յուրաքանչյուր հայորդու համար, ուր էլ որ նա լինի, Հայրենիքի, Մայր Եկեղեցու և ժողովրդի հանդեպ ազգային պարտականությունը պետք է մնա անխախտ և հարատև: Տիար Իզմիրլյանը գնահատանքով շեշտեց նաև, որ ազգային բարերար Լուիզ Մանուկյան Սիմոնի առատաձեռնությունն ու Մանուկյան ընտանիքի օրինակն են իրեն խանդավառել կարևոր այս հանձնառության մեջ:
Հանդիսության ավարտին վերաբացված բժշկական հաստատության պուրակում կատարվեց ծառատունկ ձեռամբ ՀՀ նախագահի, Գարեգին Բ Վեհափառ Հայրապետի և Տիգրան Իզմիրլյանի:
