Ընդունելություններ Մայր Աթոռ Ս. Էջմիածնում
26.04.2015
Ապրիլի 24-26-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը հրաժեշտի հանդիպումներ ունեցավ Հայոց Ցեղասպանության 100-րդ տարելիցի առիթով Հայաստան ժամանած Քույր Եկեղեցիների հոգևոր պետերի և Քրիստոնեական տարբեր Եկեղեցիների ներկայացուցիչների, միջեկեղեցական ու միջկրոնական կառույցների պատասխանատուների հետ:
Նորին Սրբությունն առանձին հանդիպումներ ունեցավ Արևելյան Ուղղափառ Եկեղեցիների ընտանիքի հովվապետերից` Ալեքսանդրիայի Պապ և Համայն Աֆրիկայի Պատրիարք Նորին Սրբություն Թավադրոս Բ-ի, Ասորի Ուղղափառ Եկեղեցու և Համայն Արևելքի Պատրիարք Նորին Սրբություն Մորան Մոր Եփրեմ Բ-ի և Մալանկարա Ուղղափառ Եկեղեցու պետ և Մալանկարայի Միտրոպոլիտ Նորին Սրբություն Բասելիոս Մար Թոմա 
Պաուլոս Բ-ի հետ` շնորհակալություն հայտնելով այս օրերին Հայ Եկեղեցուն և ժողովրդին ցուցաբերած զորակցության և Հայոց Ցեղասպանության նահատակների սրբադասման արարողությանը` նրանց աղոթական մասնակցության համար: Ամենայն Հայոց Հայրապետն ընդգծեց, որ ի Քրիստոս հոգևոր եղբայրների ներկայությունը Հայաստանում ոչ միայն մեծ մխիթարություն էր հայ ժողովրդի համար, այլև պատգամ էր ողջ աշխարհին, որ Քրիստոսի Եկեղեցու անդամները բաժանում են միմյանց և ուրախությունը, և տխրությունը:
Ամենայն Հայոց Հայրապետը նաև հանդիպում ունեցավ Անտիոքի և Համայն Արևելքի Հույն Ուղղափառ Պատրիարք Նորին Ամենապատվություն Յուհաննա Ժ-ի հետ: Նորին Սրբությունը և Պատրիարքը մասնավորապես մտահոգությամբ անդրադարձան Մերձավոր Արևելքի երկրներում բնակվող քրիստոնյաների ծանր վիճակին: Այս կապակցությամբ Գարեգին Բ Կաթողիկոսն աղոթքով մաղթեց, որ Բարձրյալը զորացնի Պատրիարքին և նրա 
հոտին` դիմագրավելու բոլոր դժվարությունները: Հետաքրքրվելով ամիսներ առաջ առևանգված պատրիարքության երկու բարձրաստիճան եկեղեցականների ճակատագրով` Հայոց Հայրապետը հույս հայտնեց, որ վերջիններս Աստծու ողորմությամբ ապահով կվերադառնան իրենց ծառայությանը:
Այս օրերին Մայր Աթոռում Ամենայն Հայոց Կաթողիկոսին հրաժեշտ տվեցին նաև Ուղղափառ Եկեղեցիների պատվիրակությունները` գլխավորությամբ Պրահայի Արքեպիսկոպոս, Չեխիայի և Սլովակիայի Միտրոպոլիտ Նորին Ամենապատվություն Ռաստիսլավի, Վաշինգթոնի Արքեպիսկոպոս, Համայն Ամերիկայի և Կանադայի Միտրոպոլիտ Նորին Ամենապատվություն Տիխոնի, Սանկտ Պետերբուրգի և Լադոժսկի Միտրոպոլիտ Նորին Սրբազնություն Վարսոնոֆիի (Ռուս Ուղղափառ Եկեղեցի), Զիմբաբվեի Միտրոպոլիտ Նորին Սրբազնություն Սերաֆիմի (Ալեքսանդրիայի և Համայն Աֆրիկայի Պատրիարքություն), Նորին Սրբազնություն Միտրոպոլիտ Տիմոթեոս Վոստրացիի (Երուսաղեմի և Համայն Պաղեստինի Պատրիարքություն), Նորին Սրբազնություն Միտրոպոլիտ Իսայսաս Թամասոսի (Կիպրոսի Ուղղափառ Եկեղեցի), Մարաթոնի Միտրոպոլիտ Նորին Սրբազնություն Մալիթոն 
(Հունաստանի Ուղղափառ Եկեղեցի), Նորին Սրբազնություն Միտրոպոլիտ Նաում Ռուսսեանի (Բուլղարիայի Պատրիարքություն), Նորին Սրբազնություն Միտրոպոլիտ Քրիզոստոմոսի (Սերբիայի Ուղղափառ Եկեղեցի): Իր գոհունակությունը հայտնելով Քույր Եկեղեցիների պատվիրակների մասնակցության առիթով` Հայոց Հայրապետը մաղթեց, որ Քրիստոսի Եկեղեցին միշտ զորեղ լինի և մշտապես իր ձայնը հնչեցնի հանուն արդարության, մարդասիրության և խաղաղության:
Ամենայն Հայոց Կաթողիկոսը իր գնահատանքը հայտնեց նաև ոգեկոչման արարողություններին իրենց մասնակցությունը բերած Անգլիկան Եկեղեցու պատվիրակներին` Լոնդոնի Եպիսկոպոս Նորին Սրբազնություն Հոն Ռիչարդ Չարթրես (Անգլիկան Եկեղեցի), Նորին Սրբազնություն Եպիսկոպոս Ենոք Թոմբեին ու Նորին 
Սրբազնություն Եպիսկոպոս Ռաջաֆի Թեմին (Սուդանի Անգլիկան Եկեղեցի): Այս առիթով Լոնդոնի Եպիսկոպոսն Հայոց Հայրապետին հանձնեց Քենթրբերիի Արքեպիսկոպոս Ջասթին Վելբիի զորակցության գրությունը:
Այս ընթացքում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Բողոքական Տուրկուի և Ֆինլանդիայի Արքեպիսկոպոս Էմերիտուս Նորին Սրբազնություն Յուկկա Պաարմային, Նորին Սրբազնություն Անդերս Բորրե Գադեգաարդին (Դանիայի Լյութերական Եկեղեցի), Հելգա Հոգլանդ Բիֆուգլիենին (Նորվեգիայի Եկեղեցի), Արքեպիսկոպոս Էմերիտուս Նորին Սրբազնություն Արներս Վայրիդին (Շվեդիայի Եկեղեցի), ինչպես նաև միջեկեղեցական և միջկրոնական կազմակերպությունների ներկայացուցիչներին` Եկեղեցիների Համաշխարհային Խորհրդի գլխավոր քարտուղար Դոկտ. Օլավ Թվեյթին, Եվրոպական Եկեղեցիների Կոնֆերանսի նախագահ Նորին Սրբազնություն Քրիստոֆեր Հիլլին, ԱՄՆ Եկեղեցիների Ազգային Խորհրդի գլխավոր քարտուղար Ջիմ Վինքլերին և «Կրոնները Հանուն Խաղաղության» կազմակերպության նախագահ Նորին Սրբազնություն Գուննար Շթելսեթթին:
