Ամենայն Հայոց Կաթողիկոսն ընդունեց Իտալիայից ժամանած կաթոլիկ ուխտավորներին
06.09.2014
Սեպտեմբերի 6-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնի «Վաչե և Թամար Մանուկյան» Մատենադարանում ընդունեց մի խումբ կաթոլիկ ուխտավորների` առաջնորդությամբ Ջենովայի կարդինալ արքեպիսկոպոս Անջելո Բագնեսկոյի:
Ողջունելով ուխտավորների այցը` Ամենայն Հայոց Հայրապետն առաջին հերթին ընդգծեց Քույր Եկեղեցիների` տարբեր թեմերի ու կառույցների կողմից Հայաստան կատարվող նմանօրինակ ուխտագնացությունների կարևորությունը, որոնք մեծապես զորացնում են միջեկեղեցական փոխադարձ կապերը:
Նորին Սրբությունը, ներկայացնելով հայ ժողովրդի անցած պատկառելի ուղին, գոհունակությամբ նշեց այն հատկորոշ իրողությունը, թե ինչպիսի կարևոր առաքելություն է ունեցել քրիստոնեությունը հայ ժողովրդի ինքնության կերտման, փրկության և հարատևության գործում, և թե ինչպես հայ ժողովուրդը, քրիստոնեական զորեղ հավատքի շնորհիվ պատվախնդրորեն հաղթահարելով իրեն բաժին հասած բոլոր փորձություններն ու արհավիրքները, այսօր անկախ պետականության ներքո կերտում է իր կյանքը:
Զրույցի ընթացքում Ամենայն Հայոց Հայրապետն անդրադարձավ նաև Քույր Եկեղեցիների հետ Հայաստանյայց Առաքելական Ս. Եկեղեցու արդյունավետ փոխհամագործակցությանը, որը հատկանշված է եղբայրական ջերմությամբ և զանազան հոգեշահ իրագործումներով:
Հանդիպմանը համայն հայության հոգևոր կենտրոն այցի առիթով իր ուրախությունն արտահայտեց կարդինալ Անջելո Բագնեսկոն` ներկայացնելով նաև Հայաստան կատարած ուխտագնացությունից ստացած իր տպավորությունները:
Վերջում Նորին Սրբությունը փառաբանական աղոթք բարձրացրեց առ Բարձրյալն Աստված, որպեսզի Երկնավորի ողորմածությամբ Քրիստոսի Եկեղեցին մշտապես հարատևի եղբայրասիրության ոգով և համընդհանուր ջանքերով փորձի դիմագրավել ներկա կյանքի բոլոր մարտահրավերները, իսկ մարդկությունը խաղաղ ու երջանիկ կյանքով ապրի ավելի բարվոք ու գեղեցիկ աշխարհի մեջ:
Հանդիպմանը ներկա էին Տ. Նաթան արքեպիսկոպոս Հովհաննիսյանը և Մայր Աթոռի Միջեկեղեցական բաժնի տնօրեն, Արթիկի թեմի առաջնորդ Տ. Հովակիմ եպիսկոպոս Մանուկյանը:
