Ամենայն Հայոց Կաթողիկոսը նախագահեց ճարտարապետ Ջիմ Թորոսյանի հոգեհանգստյան արարողությունը
09.01.2014
Հունվարի 8-ին Երևանի Ս. Հովհաննես Մկրտիչ եկեղեցում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը նախագահեց անվանի ճարտարապետ Ջիմ Թորոսյանի հոգեհանգստյան արարողությունը:
Արարողության ավարտին Վեհափառ Հայրապետն իր խոսքն ուղղեց սգակիր ընտանիքին և ներկաներին:
«Խորը ցավով տեղեկացանք Առաքելական մեր Սուրբ Եկեղեցու նվիրյալ և արժանավոր զավակ, վաստակաշատ ճարտարապետ, ակադեմիկոս տիար Ջիմ Թորոսյանի մահվան մասին:
…Լուսահոգի Ջիմ Թորոսյանը ճանաչված է Հայաստանում և Հայաստանից դուրս որպես ճշմարիտ մտավորական, տաղանդաշատ և երախտավոր ճարտարապետ: Նրա նախագծած շենքերը, համալիր կառույցներն ու կոթողները զարդարում են քաղաքամայր Երևանը, հայրենի մեր երկրի տարբեր քաղաքներ և կրում են մեծ ճարտարապետի հայրենանվեր ու ազգասեր ոգու վառ կնիքը:
Մենք մասնագետ չենք ճարտարապետության բնագավառի, և Մենք չէ, որ պիտի գնահատական տանք շնորհալի ճարտարապետի արվեստին, սակայն այսօր, երբ վերջին հանգրվան ենք ուղեկցում նրան, ցանկանում ենք փոխանցել Մեր տպավորությունները և զգացումները, որ ունեցել ենք հոգելույս Ջիմ Թորոսյանի հետ Մեր շփումների և հարաբերությունների ընթացքին: Մեր հանդիպումներում մշտապես զգացել ենք խոհեմազարդ մտավորականի վեհանձնությունը, օրինակելի բարեկրթությունը, ազնվությունն ու պարկեշտությունը, ում հետ մտերմությունը ուրախություն էր պատճառում և խորին հարգանք ու բարեկամական բարի զգացումներ ներշնչում: Նա կենսուրախ էր ու լավատես և միշտ լեցուն նոր 
մտահղացումներով: Բարեհիշատակ Ջիմ Թորոսյանն ապրում էր ստեղծագործական մշտական երկունքի մեջ և իր նախագծերը ստեղծում էր ազգային արժեքների խորը ընկալումով: Արդիականի և ազգայինի բարձրաճաշակ համադրությամբ ու բարձր վարպետությամբ նա ձգտում էր միշտ կատարելության հասցնել իր աշխատանքները` կերտելով նոր ժամանակների հայ ճարտարապետության հիանալի կոթողներ: Առանձնահատուկ գրավչություն ունեն հանգուցյալի բացառիկ տաղանդով ստեղծված, ոգի, ներշնչանք ու քաջալերություն հաղորդող նրբաճաշակ զարդաքանդակները: Ջիմ Թորոսյանի շնորհաց դրոշմն են կրում նաև նրա նախագծած եկեղեցական կառույցները` Մայր Աթոռ Սուրբ Էջմիածնի մուտքը և բացօթյա խորանը, Սուրբ Վարդան-Սուրբ Հովհաննես Մկրտիչ մատուռ-մկրտարանը, Գևորգյան հոգևոր ճեմարանի նոր մասնաշենքը, Սրբոց Հրեշտակապետաց եկեղեցին, ստալինյան բռնատիրության տարիներին նահատակյալ հոգևորականաց հուշապատը: Գովարժան է մեծանուն հայորդու տասնամյակների մանկավարժական բեղուն գործունեությունը: Նրա ոգու և շնչի ներքո ճարտարապետների նոր սերունդներ են կրթվել, ովքեր շարունակելու են լուսահոգի Ջիմ Թորոսյանի ավանդներով ստեղծագործել ու արարել` ի շինություն մեր հայրենի երկրի:
Ջիմ Թորոսյանը ճարտարապետական իր մեծ ավանդի ու վաստակի համար արդարորեն արժանացել է բազմաթիվ պարգևների: Անվանի ճարտարապետի կուրծքը զարդարել ենք նաև Առաքելական մեր Սուրբ Եկեղեցու Սուրբ Սահակ-Սուրբ Մեսրոպ պատվո բարձր շքանշանով` ի գնահատություն նրա գովարժան ներդրումի` որպես Մայր Աթոռ Սուրբ Էջմիածնի ճարտարապետական խորհրդի ատենապետ, և հայ մշակույթին ու ճարտարապետությանը մատուցած երախտարժան ծառայությունների համար:
Ցավալի կորստի այս պահին ի խորոց սրտի Մեր աղոթքն ենք բարձրացնում առ Ողորմածն Աստված մեր ժողովրդի վաստակաշատ զավակի հոգու հանգստության և խաղաղության համար և հայցում, որ Բարեգութ Տերը երկնից լուսեղեն խորաններում ընդունի անմահ հոգին նորոգ հանգուցյալ սիրելի Ջիմ Թորոսյանի: Եվ թող մխիթարիչ Սուրբ Հոգին սփոփի վշտացյալ սրտերը սգակիր Թորոսյան ընտանիքի անդամների, հարազատների և մտերիմների:
Խունկ, աղոթք և օրհնություն լուսահոգի Ջիմ Թորոսյանի պայծառ հիշատակին», - ասաց Գարեգին Բ. Ամենայն Հայոց Կաթողիկոսը։
