Ամենայն Հայոց Կաթողիկոսը հանդիպում ունեցավ Հայորդյաց տների 140 մանկավարժի հետ
15.10.2015
Հոկտեմբերի 15-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնի «Վաչե և Թամար Մանուկյան» մատենադարանում, Ուսուցչի օրվա կապակցությամբ ընդունեց Մայր Աթոռի և ՀԲԸՄ հովանու ներքո գործող Հայորդյաց տների 140 մանկավարժի` ուղեկցությամբ Հայորդյաց տների հոգևոր տեսուչ Հոգեշնորհ Տ. Կոմիտաս վարդապետ Հովնանյանի:
Մանկավարժների անունից երախտագիտության խոսք ասաց Հայր Կոմիտասը` նշելով, որ մանկավարժները մեկտեղվել են Սուրբ Էջմիածնում ստանալու Ամենայն Հայոց Հայրապետի պատգամը, Նորին Սրբության օրհնությամբ առավել խանդավառվելու և զորանալու իրենց առաքելության մեջ:
Այնուհետև ներկաներին իր օրհնությունը բերեց Գարեգին Բ Ամենայն Հայոց Կաթողիկոսը: Նորին Սրբությունն իր գնահատանքը հայտնեց Հայր Կոմիտասին, ապա նաև Հայորդյաց տների տնօրեններին ու մանկավարժներին իրենց բերած նվիրյալ և ջանադիր ծառայության համար:
«Մենք մշտապես հետևում ենք Հայորդյաց տների աշխատանքներին և ուրախություն ենք ապրում այն հաջողություններով, որոնք արձանագրվում են Հայորդյաց տների հարկից ներս», - ասաց Վեհափառը` հույս 
հայտնելով, որ ժամանակի ընթացքում հայորդյաց տներ կստեղծվեն նաև Հայաստանի խոշոր բնակավայրերում, որտեղ եկեղեցականների և ուսուցիչների նախանձախնդիր աշխատանքների արդյունքում պատանի հայորդիները կզորացնեն իրենց շնորհներն ու ձիրքերը, կստանան հոգևոր դաստիարակություն:
Ամենայն Հայոց Կաթողիկոսն ընդգծեց, որ Մայր Աթոռի Հայորդյաց տների համակարգն իր բնույթով տարբերվում է նմանատիպ հաստատություններից, որովհետև նրանց հարկի ներքո կարևորվում է ոչ միայն կրթությունը, տաղանդների և ձիրքերի բացահայտումն ու հղկումը, այլ, նախևառաջ, բարոյական կերպարի ձևավորումը: Վեհափառ Հայրապետը հավելեց, որ հայորդյաց տների մանկավարժների առաքելությունն է կերտել հայրենասեր ու հայրենանվեր անհատների, Եկեղեցու արժանավոր զավակների:
Վերջում Ամենայն Հայոց Կաթողիկոսը մաղթեց, որ Աստծու Ս. Աջը հովանի և պահապան լինի մանկավարժներին, իսկ Հայորդյաց տները շարունակեն իրենց վերելքի և ծաղկման ուղին:
Այսօր Երևանի, Գյումրիի, Էջմիածնի, Վանաձորի, Աշտարակի թվով ութ հայորդյաց տներ հաճախում են հինգ հազար մանուկներ և պատանիներ: Հայորդյաց տներում պաշտոնավարում է 330 մարդ, նրանցից 149-ը մանկավարժներ են:
