Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Գարեգին Բ Ծայրագույն Պատրիարք և Ամենայն Հայոց Կաթողիկոսը մայիսի 29-ին ընդունել է Արարատյան Հայրապետական թեմի և Արմավիրի թեմի տասնվեց հայ Եկեղեցու երիտասարդական կազմակերպությունների ավելի քան 30 ներկայացուցիչների։

Վեհափառ Հայրապետն ողջունելով ներկայացուցիչներին Մայր Աթոռ Սուրբ Էջմիածնում, գոհունակություն հայտնեց, որ Հիսուս Քրիստոսի Համբարձման տոնին նրանք ուխտագնացություն են կատարել համայն հայության համար ամենասուրբ վայրը։ Մինչ կաթողիկոսի ընդունելությունը՝ երիտասարդները մասնակցել են այս առիթով մատուցված Սուրբ Պատարագին։

Երիտասարդական կազմակերպությունների ներկայացուցիչներն իրենց երախտագիտությունը հայտնեցին Ամենայն Հայոց Հայրապետին ընդունելության համար: Ներկայացուցիչները մի շարք հարցեր ուղղեցին Հայոց Հայրապետին՝ կապված Հայ Եկեղեցու հովանու ներքո գործող երիտասարդական կառույցների գործունեության կազմակերպման և շարունակական առաքելության առնչությամբ:

Նորին Սրբությունը հորդորեց նրանց շարունակել իրենց նվիրյալ աշխատանքն այս նպատակների ուղղությամբ՝ նշելով. «Եկեղեցին ուժեղ չէ իր կաթողիկոսներով, ոչ իր առաջնորդներով, ոչ իր հոգևորականությամբ, Եկեղեցին ուժեղ է իր հավատացյալների շնորհիվ: Երբ դուք՝ եկեղեցու անդամներդ, ակտիվ եք և մտահոգված Եկեղեցու առաքելությամբ, և հանձնառությամբ եք ձեր ծառայությունը բերում Եկեղեցուն, միայն այդ դեպքում մեր առաքելությունը կարող է իրականացվել ավելի մեծ հավակնությունների և ավելի բարձր մակարդակի վրա»:
Հանդիպմանը ներկա էին Մայր Աթոռի դիվանապետ Գերաշնորհ Տ. Արշակ եպիսկոպոս Խաչատրյանն և Արժանապատիվ Տեր Տաճատ քահանա Դավիդյանը, որը ընկերակցում էր երիտասարդական միության ներկայացուցիչներին։