Գարեգին Բ Ամենայն Հայոց Կաթողիկոսի ձեռամբ օծվեց Տավուշի մարզի Ոսկեվան գյուղի Ս. Գայանե եկեղեցին
05.12.2003
Դեկտեմբերի 4-ին ձեռամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի Գուգարաց թեմում օծվեց Տավուշի մարզի Ոսկեվան գյուղի Ս. Գայանե եկեղեցին: Վեհափառ Հայրապետին ուղեկցում էին Գուգարաց թեմի առաջնորդ Տ. Սեպուհ եպս. Չուլջյանը, Նոր Նախիջեւանի եւ Ռուսաստանի հայոց թեմի առաջնորդ Տ. Եզրաս եպս. Ներսիսյանը, Արմավիրի թեմի առաջնորդ Տ. Սիոն եպս. Ադամյանը եւ Մայր Աթոռի միաբաններ:
Տասնյակ տարիներ հնամենի այս եկեղեցին փակ էր հավատացյալների առջեւ: Եկեղեցին վերականգնվեց մոսկվաբնակ գործարար Արթուր Բաղրյանի ջանքերով:
Շնորհավորելով ներկաներին եկեղեցու օծման առիթով` Նորին Սրբությունը մասնավորապես նշեց. «Բազում տարիներ այս եկեղեցին լռել էր, աղոթք եւ շարական չէր հնչում նրա կամարների ներքո, հավատացյալն այստեղ երկրպագություն չէր առնում Ավագ Ս. Խորանից, իսկ Աստված, անհավատաների մտածումով, թվում էր, թե դուրս է բերվել մեր կյանքից, եւ մեր ժողովուրդը խարխափում էր անհավատության մեջ: Բայց այսօր, հուրախություն մեզ ամենքիս բարին մուտք է գործում Ձեր կյանքից ներս, Աստված կրկին խոսելու է Ձեզ հետ իր կենարար պատվիրաններով ու պատգամներով, որպեսզի Ձեր կյանքը դառնա օրհնյալ եւ աստվածահաճո. որպեսզի չարը դուրս մղվի Ձեր հոգիներից ու սրտերից. եւ սերը, եղբայրսիրությունը, կամեցողությունը, ողորմածությունը վերստին Ձեր կյանքի ուկեղիցը լինեն:...Մեր ազգի փրկության ճանապարհը 1700 տարիներ շարունակ եղել եւ մնում է Աստծո ճանապարհը, որ անցնում է եկեղեցու միջով»:
Գարեգին Բ Կաթողիկոսն իր գնահատանքը հայտնեց նաեւ տեր եւ տիկին Արթուր եւ Գայանե Բաղրյաններին` պարգեւատրելով նրանց Հայ Եկեղեցու «Սբ. Գրիգոր Լուսավորիչ» բարձրագույն շքանշանով:
Սրբազան արարողությանը ներկա էին Տավուշի մարզպետը, բազմաթիվ հավատացյալներ:
