Ամենայն Հայոց Կաթողիկոսն ընդունեց «Ֆուլլեր տնաշինական կենտրոնի» կամավորներին
13.06.2018
Հունիսի 13-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում հյուրընկալեց «Ֆուլլեր տնաշինական կենտրոն» բարեգործական կազմակերպության միջազգային կամավորներին` ուղեկցությամբ կազմակերպության ատենապետ Դևիդ Սնելի և խմբի ղեկավար Լեո Մանուելյանի:
Նորին Սրբությունը բարձրորեն գնահատեց նրանց աստվածահաճո առաքելությունը, որի շնորհիվ օգտակարություն է ցուցաբերվում բազում կարիքավոր ընտանիքների: Հայոց Հայրապետը նաև ուրախությամբ արձանագրեց, որ Հայոց Եկեղեցին նույնպես թեմերի և եկեղեցական կառույցների միջոցով իր մասնակցությունն է բերել օգտաշատ այս ծրագրին:
Ամենայն Հայոց Կաթողիկոսն անդրադարձավ նաև Հայ Եկեղեցու տարբեր սոցիալական ու մարդասիրական ծրագրերին, որոնց արդյունքում բազում կարիքավոր անձինք և ընտանիքներ ստանում են պատշաճ աջակցություն:
Այնուհետև շնորհակալության խոսքով հանդես եկավ տիար Դեյվիդ Սնելը` ընդգծելով, որ կենտրոնի հայաստանյան մասնաճյուղն աշխարհում ամենաարդյունավետն է` աշխատանքներում Եկեղեցու ներգրավվածության շնորհիվ: Վերջինս ընդգծեց, որ կենտրոնը մշտապես զորակից է Եկեղեցուն, և պատրաստակամություն հայտնեց ծրագրի շրջանակներում շարունակելու գործակցությունը
Հայոց Եկեղեցու հետ: Իր հերթին տիար Լեո Մանուելյանը նույնպես անդրադարձավ Վեհափառ Հայրապետի անձնական մասնակցությանը ծրագրին:
Վերջում Գարեգին Բ Հայրապետն ազնիվ աշխատանքի, հանձնառության և Հայ Եկեղեցուն ցուցաբերված զորակցության համար իր գոհունակությունը հայտնեց նրանց` հորդորելով նույն նախանձախնդրությամբ շարունակել իրենց օրհնյալ ընթացքը:
