Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Սիրելի հավատավոր զավակներ Մեր,
Մեծի պահոց շրջանի հոգևոր ապրումներով քայլ առ քայլ հասել ենք Ավագ հինգշաբթի օրվան։ Այսօր հիշատակեցինք Վերնատանը մեր Տեր Հիսուս Քրիստոսի կողմից Սուրբ Հաղորդության խորհրդի հաստատումը և երեկոյան Խավարման կարգի արարողությամբ մոտենալու ենք այս նվիրական շաբաթվա ամենախորհրդավոր հանգրվանին՝ Ավագ ուրբաթին։
 
Սիրելիներ, Ավագ ուրբաթ օրը կոչված ենք աղոթքներով ու հոգևոր խոկումներով, զղջումով և ապաշխարությամբ անդրադառնալու մեղքից մեր ազատագրման համար Տիրոջ կրած սոսկալի չարչարանքներին, Նրա քավչարար մահվանը և մեզ համար բացվող փրկության ճանապարհին։
 
Հենց այս օրը, երբ մենք տրտմությամբ հանդերձ, Սուրբ Հարության ավետիսի խորհրդով փառաբանում և մեծարում ենք Փրկչի մահը, աղոթքով հիշենք մեր հայրենյաց պաշտպաններին՝ նահատակ զավակներին, վիրավորներին, գերության մեջ գտնվողներին և անհայտ կորածներին, ովքեր հանձն առան քրիստոսանման զոհողություններ, և արժևորենք այն գինը, որը վճարվեց հանուն խաղաղության և հայոց կյանքի հարատևության։
 
Հայրապետիս հորդորն է, որ Տիրոջ խաչելության պատկերը մեր հոգում՝ ամուր մնանք հավատով և հարատևորեն աղոթենք՝ հայցելով Երկնավոր Հոր ողորմությունը մեր հոգիներին, նաև խաղաղություն ու անվտանգություն՝ մեր հայրենիքին, միասնականություն և փորձություններից վեր հառնելու աննահանջ կամք՝ համայն մեր ժողովրդին։