Օծվեց Ագարակ գյուղի նորակառույց Սուրբ Աստվածածին մատուռը
Հոկտեմբերի 4-ին Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի ձեռամբ օծվեց Արագածոտնի թեմի Ագարակ գյուղի նորակառույց Սուրբ Աստվածածին մատուռը, որը կառուցվել է Հրաչ Պողոսյանի եւ նրա ընտանիքի բարերարությամբ:
Գյուղի բնակչությունը մեծ խանդավառությամբ եւ աղուհացով դիմավորեց Ամենայն Հայոց Կաթողիկոսին: Այնուհետեւ «Հրաշափառ» շարականի երգեցողությամբ, հոգեւորականների հանդիսավոր թափորով ու բազմաթիվ հավատացյալ հայորդիների ուղեկցությամբ Նորին Սրբությունը մուտք գործեց նորակառույց մատուռ: Շարականների երգեցողության եւ սաղմոսերգության ներքո գինով լվացվեց Սուրբ Սեղանը, որից հետո Վեհափառ Հայրապետը նորօրհնյալ Սրբալույս Մյուռոնով օծեց մատուռի Սուրբ Սեղանն ու Մկրտության Ավազանը:
Արարողության ավարտին Ն.Ս.Օ.Տ.Տ. Գարեգին Բ Ամենայն Հայոց Կաթողիկոսն իր Հայրապետական օրհնությունն ու բարձր գնահատանքը բերեց Հրաչյա Պողոսյանին եւ իր ընտանիքի անդամներին, ովքեր սիրահոժար կերպով եւ իրենց արդար վաստակով կառուցել են Սուրբ Աստվածածնի անունը կրող սրբազան մատուռը: Այնուհետեւ Ագարակ գյուղի բնակչությանն ուղղված իր օրհնության խոսքում Վեհափառ Հայրապետը մաղթեց, որ նորօրհնյալ Մյուռոնի անուշաբույրը տարածվի ողջ գյուղի վրա, Սուրբ Հոգու շնորհներն իջնեն գյուղի յուրաքանչյուր անդամի վրա եւ շնորհազարդեն նրանց կյանքի գեղեցկությամբ, ավետարանական նվիրական արժեքներով, որպեսզի ծաղկի ու առաջընթաց ապրի գյուղը եւ բարօր դառնա գյուղի յուրաքանչյուր բնակչի կյանքը:
«Ցնծացեք եւ ուրախ եղեք այսօրվա ուրախությամբ, որովհետեւ այս մատուռը պիտի դեպի երկինք բարձրացնի ձեր աղոթքը, ձեր հայցը, ձեր ուխտը, եւ Աստված` ունկնդիր ձեր խնդրանքներին, պիտի բազմապատիկ վարձատրի ձեզ, օրհնի ձեզ, ձեր բարի կյանքը եւ ձեր հավատո բարի գործերը: Ուրեմն մնացեք Աստծո սիրո մեջ, քայլեք Աստծո պատվիրանների ճանապարհներով, որպեսզի Աստծո օրհնությունը միշտ ուղեկից լինի ձեր կյանքին»,- պատգամեց Վեհափառ Հայրապետը:
Մատուռի օծումից հետո նորաօծ մատուռում կատարվեցին Մկրտության եւ Պսակի առաջին սրբազան արարողությունները: Վերջում մատուռին կից բակում գեղարվեստական կատարումներով հանդես եկան Մայր Աթոռ Սուրբ Էջմիածնի Նորքի Հայորդյաց տան սաները:
Վեհափառ Հայրապետին ուղեկցում էին Մայր Աթոռ Սուրբ Էջմիածնի լուսարարապետ Տ. Արարատ եպիսկոպոս Գալթագճյանը, Արագածոտնի թեմի առաջնորդական տեղապահ Տ. Գրիգոր աբեղա Խաչատրյանը եւ Մայր Աթոռի միաբաններ: Արարողությանը ներկա էին Արագածոտնի մարզպետ Գաբրիել Գյոզալյանը, Աշտարակի քաղաքապետ Գագիկ Թամազյանը եւ մարզային իշխանությունների այլ ներկայացուցիչներ:
