Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Մոտենում է Հայոց Ցեղասպանության 94-րդ տարելիցը, եւ Մայր Աթոռ Ս. Էջմիածինը հանդես է գալիս տեղեկատվության հատուկ խնդրանքով:

Եվրոպական շատ երկրներում հայ ժողովուրդը իր մասնակցությունը բերեց Հոլոքոստի ժամանակ հրեա ժողովրդի փրկության եւ պաշտպանության գործում: Այնուամենայնիվ, միայն մի քանիսի անուններն են մեզ հայտնի, որոնցից մեկը` Արա Երեցյանն է, ում անունը հայտնի է: Երկրորդ համաշխարհային պատերազմի ժամանակ պրն. Երեցյանը փրկել է մեծ թվով հունգարաբնակ հրեաների:

Սակայն քիչ հայտնի են երջանկահիշատակ Վազգեն Ա Ամենայն Հայոց Կաթողիկոսի սխրանքները, ով այդ տարիներին Ռումինիայում փրկեց հրեա երեխաներին ֆաշիստական բնաջնջումից:

Միջազգային Ռաուլ Վոլենբերգ հիմնադրամը խնդրանքով դիմել է Հայ Եկեղեցուն գտնել այն հայ ժողովրդի զավակներին, ովքեր Հոլոքոստի ժամանակ իրենց մասնակցությունն են ցուցաբերել տուժածներին փրկելու գործում:

«Հայ ժողովրդի համար Ցեղասպանության մեծագույն աղետով սկսված 20-րդ դարը մարդկության պատմության մեջ մնաց իբրեւ երկու համաշխարհային պատերազմերի դար: Նույն այն մտածողությամբ, որով կազմակերպվեցին սոսկալի, վայրագ ջարդերը հայերի, ծնունդ առան համակենտրոնացման ճամբարներն ու գազախցիկները: Նոր դար է սկսվում եւ պիտի սկսվի նոր մտածողությամբ` բռնությունն ու ոճիրը մերժող եւ մարդասիրական արժեքները հաստատող»:
Գարեգին Բ, Ամենայն Հայոց Կաթողիկոս

Միջազգային Ռաուլ Վոլենբերգ հիմնադրամը հասարակական կազմակերպություն է, որը հիմնադրվել է ԱՄՆ կոնգրեսական Թոմ Լանթոսի եւ միջկրոնական գործիչ Բարուխ Թենեմբաումի կողմից: Հիմնադրամի առաքելությունն է ճանաչել, պատվել, պաշտպանել եւ հրապարակայինորեն ընդունել ողջակիզման եւ ցեղասպանության տուժածների պաշտպաններին: Նորին Սրբությանն ուղղված իր նամակում պրն. Թենեմբաումը նշում է. «Հայ ժողովուրդը մեծ ներդրում ունի այս փրկության գործում, բայց պետք է ընդունել, որ միայն քչերն են հայտնի դարձել: Մեր պարտքն է բացահայտել նրանց հերոսությունը, որպեսզի հետագայում կանխենք ցեղասպանությունները»:

Սույն խնդրանքին, եկեղեցու դրական պատասխան նամակում մասնավորապես նշվում է. «Նորին Սրբությունը մի քանի անգամ նշել է, որ եթե Հայոց Ցեղասպանությունը ճանաչվեր եւ պատժվեր ժամանակին, ապա հրեա ժողովրդի ողջակիզումը, ինչպես նաեւ շատ այլ ցեղասպանություներ հնարավոր կլիներ կանխել»:

Կամ տեղեկատվությունը կարող եք անմիջապես ուղարկել Միջազգային Ռաուլ Վոլենբերգ հիմնադրամ