Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

Գուգարաց թեմի առաջնորդ Տ. Սեպուհ եպս. Չուլջյանի օրհնությամբ եւ Ս. Գր. Նարեկացի եկեղեցու հոգեւոր հովիվ Տ. Վահան քահանա Ազարյանի առաջնորդությամբ Վանաձորի մի շարք կրթօջախների ուսուցիչներ ու սաներ, Բուհ-երի ուսանողներ, հասարակական կազմակերպությունների երիտասարդներ հուլիսի 13-ին ներկա եղան Մայր Աթոռ Սուրբ Էջմիածնում մատուցվող Պատարագին: Երիտասարդների համար ուխտի գաղափարն էլ ավելի շոշափելի ու իրական դարձավ Պատարագի ժամանակ համաքրիստոնեական եւ հայ եկեղեցու 18 սուրբերի մասունքներով ստացած օրհնությամբ:

Պատարագի ավարտին ուխտավորները ստացան Ն.Ս.Օ.Տ.Տ. Գարեգին Բ Ամենայն հայոց հայրապետի օրհնությունը, որից հետո նրանց ողջունեց թեմակալ Սրբազան Հայրը: Կարեւորելով ուխտագնացությունը` որպես հնավանդ ու գեղեցիկ ավանդությունների վերականգնման միջոց, նա իր ոգեշունչ խոսքով դիմեց երիտասարդներին:

Ուխտի ճանապարհը շարունակվեց դեպի Ս. Գայանե, Ս. Հռիփսիմե վանքեր այցելությամբ, ապա Էջմիածնում արդեն 18 տարի գործող «Հայ միասնության խաչ» մշակութային կազմակերպություն այցելությամբ: Այնտեղ ուխտավորների աչքերի առջեւ մեկ այլ աշխարհ բացվեց. Արեւմտյան Հայաստանից բերված մասունքները` հողը, Արարատ լեռան գագաթից բերված քարը, Վանա լճի ջուրը, «ամբողջացրել էին» Հայոց աշխարհը եւ իրատեսականի փոխել ուխտավորի հոգու երազանքը:

Վերջին հանգրվանը Օշականն էր, ուր ուխտավորները խոնարհվեցին Ս. Մաշտոցի գերեզմանին եւ այցելեցին խաչքարահյուս Հայոց այբուբենի պուրակ:

Օրը ոգեւորող էր, ոգեշնչող ու հավատքով լի` արժեւորելով եկեղեցու եւ հայրենիքի, դպրության ու մշակույթի, հայոց ազգային ու հոգեւոր մասունքների պահպանումը ու Հայի ինքնության գիտակցությունը: