Հոգեհանգիստ Եթովպիայի Ուղղափառ Եկեղեցու հովվապետի համար
27.08.2012
Օգոստոսի 27-ին Միածնաէջ Մայր Տաճարում նախագահությամբ Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի` կատարվեց հոգեհանգստյան արարողություն Եթովպիայի Ուղղափառ Եկեղեցու երջանկահիշատակ Աբունա Պաուլոս Պատրիարքի համար:
Մինչ արարողությունը Մայր Աթոռ Ս. Էջմիածնի Միջեկեղեցական հարաբերությունների բաժնի տնօրեն Տ. Հովակիմ եպիսկոպոս Մանուկյանն անդրադարձ կատարեց Աբունա Պաուլոս պատրիարքի հովվապետության տարիներին, կարեւոր դերակատարությանը Եթովպիայի Եկեղեցու զորացման գործում, ինչպես նաեւ Հայոց Եկեղեցու եւ Եթովպիայի Եկեղեցու եղբայրական հարաբերություններին: Իր խոսքում Սրբազան Հայրը, հանուն Ամենայն Հայոց Կաթողիկոսի եւ հոգեւոր դասի, վերստին ցավակցություն հայտնեց Եթովպիայի Եկեղեցուն եւ ժողովրդին:
Այնուհետեւ Վեհափառ Հայրապետի գլխավորությամբ Մայր Աթոռի միաբաններն աղոթք բարձրացրեցին Եթովպիայի Ուղղափառ Եկեղեցու լուսահոգի գահակալի համար:
Հոգեհանգստյան արարողությանը ներկա էին ՀՀ ԱԳ նախարարի տեղակալ Սերգեյ Մանասարյանը, Հայաստանում, Վրաստանում եւ Արեւելյան Եվրոպայում Հայ Կաթողիկե Եկեղեցու առաջնորդ Ռաֆայել արքեպիսկոպոս Մինասյանը, Եթովպիայի Դաշնային Ժողովրդավարական Հանրապետությունում ՀՀ արտակարգ եւ լիազոր դեսպան Արմեն Մելքոնյանը (նստավայրը` Կահիրե), Հայաստանում հավատարմագրված դիվանագիտական առաքելությունների ներկայացուցիչներ:
Օգոստոսի 23-ին երջանկահիշատակ պատրիարքի հուղարկավորությանը մասնակցեց նաեւ Հայաստանյայց Առաքելական Ս. Եկեղեցու պատվիրակությունն ի դեմս Հարավային Ռուսաստանի հայոց թեմի առաջնորդ Տ. Մովսես եպիսկոպոս Մովսիսյանի եւ Ռումինիայի հայոց թեմի առաջնորդ Տ. Տաթեւ եպիսկոպոս Հակոբյանի:
