Հայաստանյայց Առաքելական Սուրբ Եկեղեցի Մայր Աթոռ Սուրբ Էջմիածին

ԵՀԽ համաժողովն ընդունեց հատուկ բանաձև

 Հարավային Կորեայի Բուսան քաղաքում ընթացող Եկեղեցիների Համաշխարհային Խորհրդի 10-րդ համաժողովին քննարկվեցին և որդեգրվեցին մի շարք բանաձևեր:
     Նոյեմբերի 6-ի նիստում «Պետականազուրկ ժողովուրդների իրավունքի մասին» հայտարարության քննարկման ժամանակ Ամենայն Հայոց Կաթողիկոսության պատվիրակության կողմից բարձրացվեց Լեռնային Ղարաբաղի ժողովրդի ազատ ու անկախ ապրելու իրավունքի պաշտպանության հարցը: Պատվիրակությունը կոչ արեց ԵՀԽ-ին դատապարտելու այս հարցի առնչությամբ աշխարհում կիրառվող երկակի չափանիշները:
     Նոյեմբերի 6-ի կեսօրի նիստում տեղի ունեցավ նաև ԵՀԽ Կենտրոնական կոմիտեի ընտրությունը: Ամենայն Հայոց Կաթողիկոսության երկու պատվիրակներ Տ. Վիգեն արքեպիսկոպոս Այքազյանը և Փոլա Տեր-Մաթոյանը վերընտրվեցին ԵՀԽ Կենտրոնական կոմիտեի անդամ ևս ութ տարով: Տ. Վիգեն արքեպիսկոպոս Այքազյանը միաձայն ընտրվեց Գործադիր կոմիտեի ընտրական հանձնախմբի ղեկավար:
Նոյեմբերի 8-ին 10:55ին համաժողովի շուրջ 345 եկեղեցիների 300 պատվիրակներն Հայոց ցեղասպանության 100-ամյա տարելիցի առիթով ընդունեցին հատուկ բանաձևը, որն արդյունքն էր Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի և Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսի պաշտոնական դիմումների, ինչպես նաև ԵՀԽ Կենտրոնական և գործադիր կոմիտեներում Հայ Եկեղեցու նվիրակների հետևողական աշխատանքի:
     Հայոց Ցեղասպանության 100-ամյակի առթիվ ընդունված բանաձևը ուղղորդում է ԵԿՀ-ի Գլխավոր քարտուղարությանը դեպի`

• 2015 թ. ապրիլի 24-ի շրջանին Ժնևում կազմակերպել միջազգային կոնֆերանս Եկեղեցիների Համաշխարհային Խորհրդի անդամ Եկեղեցիների, միջազգային զանազան կազմակերպությունների, իրավաբանների, իրավապաշտպանների մասնակցությամբ:
• Սույն միջազգային կոնֆերանսին զուգընթաց կազմակերպել միջեկեղեցական աղոթք Ժնևի Մայր տաճարում:
• Միջազգային կոնֆերանսի օրերին հրավեր ուղղել աշխարհի բոլոր Եկեղեցիներին` աղոթել հայոց նահատակների համար:

 Բանաձևը, որ Հայոց ցեղասպանության 100-ամյա տարելիցին ընդառաջ վերահաստատեց 1983 թ.-ին ընդունած ԵՀԽ դիրքորոշումը, նշանակալի ձեռքբերում էր Հայոց ցեղասպանության ճանաչման գործընթացում: