ԱՄԵՆԱՅՆ ՀԱՅՈՑ ՀԱՅՐԱՊԵՏԸ ՇԻԳԱԿՈՅԻ ՄԷՋ
Հանդիպում Շիգակոյի Կաթոլիկ Եկեղեցւոյ Կարտինալ Ճորճի հետ
Նախորդ գիշեր« Երեքշաբթի Հոկտեմբեր 23« Ռէյսինի Ս. Մեսրոպ Եկեղեցւոյ սրահին մէջ տեղի ունեցած ընդունելութենէն ետք` Ամենայն Հայոց Կաթողիկոս Ն.Ս.Օ.Տ.Տ. Գարեգին Բ. Իր շքախումբով Շիգակօ մեկնեցաւ:
Չորեքշաբթի Հոկտեմբեր 24-ի առաւօտուն` Նորին Սրբութիւնը պանդոկի հիւրասենեակին մէջ ընդունեցաւ այցելութիւնը Կաթոլիկ Եկեղեցւոյ Շիգակոյի Կարտինալ Ճորճի` ի ներկայութեան Թեմակալ Առաջնորդ Գերշ. Տ. Խաժակ Արք. Պարսամեանի եւ այլ հոգեւորականներու: Այս հանդիպումի ընթացքին քննարկուեցան հայ Առաքելական Եկեղեցւոյ եւ Կաթոլիկ Եկեղեցւոյ փոխ յարաբերութիւնները եւ համագործակցութիւնը: Հանդիպումի աւարտին` Ամենայն Հայոց Հայրապետը Կարտինալ Ճորճի նուիրեց ոսկեզօծ լանջախաչ մը` ի նշան երկու եկեղեցիներու բարեկամութեան:
Օծում Շիգակոյի Ս. Գրիգոր Լուսաւորիչ Եկեղեցւոյ նորակառոյց դռներուն
Կէսօրուան ժամը 12:00-ին` Ամենայն Հայոց Հայրապետը կատարեց օծումը Շիգակոյի Ս. Գրիգոր Լուսաւորիչ Եկեղեցւոյ նորակառոյց եւ գեղակերտ մուտքի դռներուն:
Եկեղեցականներու դասը եւ հաւատացեալները մուտք գործեցին Եկեղեցի« ուր տեղի ունեցաւ կարճատեւ արարողութիւն մը« որուն ընթացքին Նորին Սրբութիւնը Իր պատգամին մէջ անդրադարձաւ Հայ Եկեղեցւոյ առաքելութեան` Հայ ժողովուրդի կեանքին մէջ« շեշտելով որ Հայ մնալու առաջին նախապայմանն է հայոց հաւատքի եւ հայոց եկեղեցւոյ պահպանումը` մանաւանդ Հայրենիքէն հեռու սփիւռքի մէջ« ուր եթէ գոյութիւն չունենար Հայ Եկեղեցւոյ հաւաքականութիւն` Հայը Հայուն դժուարաւ պիտի կարենար հանդիպիլ:
Արարողութենէն ետք Հայոց Սրբազնագոյն Կաթողիկոսը ժամանակ անցուց հաւատացեալներուն հետ« եւ համբերութեամբ« եւ անկեղծութեամբ եւ համոզիչ կերպով պատասխանեց ներկաներուն ուղղած հարցումներուն« ինչպէս Հայոց Պատարագի Անգլերէն տարբերակի« զանազան հանդիպումներու« Մայր Աթոռ Ս. Էջմիածնի հովանաւորութեան ներքեւ գործող հիւանդանոցներու անհրաժեշտութեան եւ այլ հարցեր:
Հրաշափառի արարողութիւն
Յետ միջօրէի ժամը 7:00-ին` հրաշափառ արարողութիւն տեղի ունեցաւ Ս. Պօղոս եւ Պետրոս Յունական Ուղղափառ Եկեղեցւոյ մէջ« ուր ներկայ էր Շիգակոյի եւ շրջակայքի Հայ հաւատացեալներու հոծ բազմութիւն մը:
Հիւրընկալ Եկեղեցւոյ աւագերէց Եպիսկոպոսը բարի գալուստ մաղթեց Ամենայն Հայոց Հայրապետին: Գերշ. Տ. Խաժակ Արք. Պարսամեան` Նորին Սրբութիւնը ներկայացնող իր խօսքերուն մէջ անդրադարձաւ Ամերիկայի Ներկայացուցիչներու Տան Արտաքին Յարաբերութեանց Յանձնաժողովին (Հոկտեմբեր 10)` Ամենայն Հայոց Հայրապետի արտասանած բացման աղօթքին:
Իր պատգամին մէջ Հայոց Հայրապետը ըսաւ. «Փառքդ շատ լինի Տէր« յոյսդ մեծ լինի ժողովուրդ Հայոց: Մեծ Եղեռնից տասնամեակներ անց` Ամերիկայի այս օրհնեալ հողի վրայ տունդ ես վերստին կանգնեցրել« հոգեւոր եւ ազգային կեանքդ շէնացրել: Երջանկայիշատակ մեր Հայրապետներից Վազգէն Ա. Հայ ազգի հոգեւոր վերածնունդը կոչել է "Հայ հաւատի հրաշքը": Ամերիկայի հայութիւնը վառ վկայութիւնն է Հայ ժողովուրդի յարութեան հրաշքի« նրա վերածնուելու զօրութեան` որի ակունքը կեանքի հաւատքն է Քրիստոսով: Սիրելիներ« ձեր ընտանիքների կեանքի պատմութիւնն է Արեւելեան Թեմի պատմութիւնը. այն սկիզբ է առնում պանդխտութեան մէջ ձեր հայրերի տքնաջան աշխատանքով« արդար վաստակով եւ այս վաստակի արդիւնքը Հայ Եկեղեցիին« Հայ Դպրոցին« ազգային խնամատար եւ մշակութային հաստատութիւններին ընծայաբերումով« զոհողութեամբ ու անմնացորդ ծառայութեամբ ազգային կեանքին»:
Պատգամի աւարտին` Ամենայն Հայոց Կաթողիկոսը խաչքար եւ սրբապատկեր նուիրեց Յոյն Եկեղեցւոյ աւագերէցին` որպէս գրաւական երկու եկեղեցիներու բարեկամութեան եւ ի յիշատակ Հայոց Հայրապետի այցելութեան: Յուշանուէր յանձնեց նաեւ Շիգակոյի եւ շրջակայքի Հայ Եկեղեցիներու հովիւներուն:
Յոյն Եկեղեցւոյ սրահին մէջ տեղի ունեցաւ ընդունելութիւն« որուն ընթացքին« ինչպէս ամէն տեղ« աջահամբոյրի համար ներկաները մօտեցան Ամենայն Հայոց Հայրապետին:
